Արտագնա աշխատանքի մեկնողների ստացած եկամուտներից որոշակի ժամանակով եկամտային հարկ չենք հարկի. Բադասյան

Որոշակի բողոքներ կային արտագնա մեկնողների շրջանում, բայց մեր օրենսդրությունը շատ վաղուցվանից նախատեսում է, որ արտագնա մեկնողները նույնպես եկամտային հարկ պետք է վճարեն՝ աշխատանքի երկրում եւ Հայաստանում առկա եկամտային հարկեի տարբերության չափով, բայց դա չի իրականացվել: Այս մասին այսօր՝ փետրվարի 23-ին, կառավարության նիստում հայտարարեց ՀՀ վարչապետ Նիկոլ Փաշինյանը:

Նա ՊԵԿ նախագահ Ռուստամ Բադասյանից հետաքրքրվեց, թե ինչին են վերաբերում քաղաքացիների բողոքները:
Բադասյանն ասաց. «Այո, Հայաստանի հարկային օրենսդրության ամբողջ պատմության ընթացքում գործել է հետեւյալ կանոնը, որ ՀՀ ռեզիդենտը վճարում է թե Հայաստանում, թե արտասահմանում ստացած եկամուտներից հարկ: Որեւէ մեխանիզմ չի եղել այդ պարտականությունը կյանքի կոչելու: Մենք 2022-ին ԱՊՀ շրջանակներում միացել ենք համաձայնագրի, որով նախատեսվում է, որ հարկային մարմինները իրար միջեւ կփոխանակեն էլեկտրոնային տեղեկություններ միմյանց քաղաքացիների ստացած եկամուտների եւ վճարած եկամտային հարկի մասին: Առաջին անգամ 2023-ին ենք ստացել այդ տեղեկությունը եւ սկսել ենք վարչարարություն իրականացնել եւ մեր քաղաքացիներին ծանուցել ենք առկա հարկային պարտավորությունների մասին»:

ՊԵԿ նախագահը հստակեցրեց, որ ՌԴ-ում գործում է 13 տոկոս եկամտային հարկի դրույքաչափ, իսկ Հայաստանում 20 տոկոս, քաղաքացին պետք է վճարի 7 տոկոս տարբերությունը: «Օբյեկտիվ դժգոհություններից մեկն այն է, որ եթե ՌԴ-ում չգրանցված աշխտանք է տեղի ունեցել, ապա մենք այդ տեղեկությունը չէինք ստանալու, հետեւաբար, լրացուցիչ հարկային պարտավորություն չէինք առաջադրելու: Իսկ այն դեպքում, երբ գրանցված աշխատողների դեպքում այդ պարտավորությունն առաջանում է»,-ասաց նա:
Փաշինյանը նկատեց, որ դա նաեւ Հայաստանում բոլոր աշխատողներին է վերաբերում. «Հիմա բոլորը կարող են ասել՝ բա Հայաստանում էդքան ստվերային աշխատող կա, ինչի՞ եք մեզնից հարկ վերցնում»:

ՊԵԿ նախագահն արձագանքեց, որ հայտարարագրման համակարգի փուլային ներդրումով, որն ամբողջական կներդրվի  2026-ից, թիրախավորում են տարբեր հարաբերություններ. «Ինչպես վարձակալության հարաբերություններն ենք լուծել, այնպես էլ փորձում ենք փուլ-փուլ գնալ նրան, որ բոլորը վճարեն եկամտային հարկերը:

Քանի որ սովորույթի ուժով երբեւէ նման հարկային պարտավորություններ չեն հայտարարագրվել եւ եկամտային հարկ չի վճարվել, նաեւ տույժեր են հաշվարկվել: Կարծում ենք, որ մենք կարող ենք որոշակի օրենսդրական փոփոխություններով մեղմել, վերացնել այս ազդեցությունները եւ գնալ փուլային տարբերակով, հայտարարագրման համակարգի ներդրման ուղղությամբ: Եկել ենք եզրակացության, որ եթե ստանում ենք տեղեկատվություն օտարերկրյա պետությունում ստացած եկամտի եւ վճարված հարկերի մասին, ապա տարբերությունը որոշակի ժամանակով կարող են ՀՀ-ում չհարկել»,-ասաց Ռուստամ Բադասյանը: