Հին ու նոր 30 գինեգործարանների գինիները բնության գրկում․ Դիլիջանում անցկացվեց «DILIJAN WINE FEST» փառատոնը. լուսանկարներ

Տնտեսություն

15:54, 29 август 2022

Օգոստոսի 27-ից-28-ը Դիլիջանում անցկացվեց «DILIJAN WINE FEST» գինու փառատոնը, որը տեղի ունեցավ Աղասի Խանջյանի ամառանոցի հարակից տարածքում։ Փառատոնին մասնակցում էին ավելի քան 30 գինեգործարաններ, ինչպես նաև տարբեր ոճային ռեստորաններ և տեղական արտադրողներ։

Մասնավորապես՝ ծրագիրն իր մեջ ներառել էր գինու համտեսի վարպետաց դասեր, որտեղ այցելուները համտեսեցին «Kataro», «TUS» և «Meyron», «Gevorkyan Winery» ընկերությունների գինիները և մասնակցեցին սաբրաժի վարպետաց դասի` համտեսելով «Keush»-ի հրաշալի գինիները։

Իրականացվեց գինով նկարչություն «Voskevaz Winery» -ի աջակցությամբ։ Միջոցառման ընթացքում տեղի ունեցավ ավանդական խաղողի տրորման արարողություն, երեկոյան կինոդիտումներ, էթնո-արտիստների ներկայացումներ, խաղողագործության պատմության մասին թատերական և պարային ներկայացումներ, ինչպես նաև իրականցվեց բարեգործական դրամահավաք` Արեգ Բալայանի (Blojiks) ստեղծած տեսականու վաճառքից ստացված հասույթը կուղղվի ի աջակցություն Արցախի։

Փառատոնի երաժշտական մասն ապահովեցին հայտնի երաժշտական խմբեր ու կատարողներ, մասնավորապես՝ օգոստոսի 27-ին ելույթ ունեցավ «Rafael Petrossian Trio»-ն Սոնա Գյուլխասյանի մասնակցությամբ, իսկ օգոստոսի 28-ին՝ «Karen Grigoryan Trio»-ն Աննա Կոստանյանի մասնակցությամբ և Tarup Trio by Miqayel Voskanyan:

Բացի բուն մշակութային ծրագրերից՝ այցելուները կարողացան համտեսել լավագույն ռեստորանների կողմից առաջարկվող ուտեստները` TAVA, Papanino, Machar 44, Mikayelyan Family Farm, Ootelie։

«DILIJAN WINE FEST»-ի կազմակերպիչը TIME TO ընկերությունն է, որը զբաղվում է Հայաստանում խոշոր փառատոների և այլ միջոցառումների անցկացմամբ: Միջոցառումների համար վայրեր ընտրելիս գործակալությունը նախապատվությունը տալիս է Հայաստանի մարզերին՝ ներքին զբոսաշրջությունը զարգացնելու, ավելի շատ զբոսաշրջիկներ ներգրավելու և տեղական բիզնեսին աջակցելու համար։