Լռության օրը վարչապետի պաշտոնակատարի հայտարարությունը դիտել էինք որպես խախտում, բայց հետագայում դատարանը ոչ իրավաչափ համարեց մեր դիրքորոշումը. Մուկուչյանը՝ Խունդկարյանին

Սահմանադրական դատարանն այսօր՝ հուլիսի 12-ին, շարունակում է հունիսի 20-ի արտահերթ ընտրությունների արդյունքները վիճարկող 4 քաղաքական ուժերի դիմումների քննությունը:  

«Արդյոք եղե՞լ է իրավիճակ, որ ամբողջական քաղաքը հոսանք չունենա, որովհետև ըստ ներկայացված նյութերի՝ այդպիսի կասկածներ էլ կան»,- ԿԸՀ նախագահ Տիգրան Մուկուչյանին հարցրեց ՍԴ դատավոր Երվանդ Խունդկարյանը՝ կապված «Զարթոնք» կուսակցության դիմումի հետ:

Մուկուչյանը, պատասխանելով հարցին, ասաց. «Խոսքը եղել է բարձրավոլտ լարման հոսանքագծերի հոսանքազրկմանը, որովհետև ոչ թե հետո ենք ստացել տեղեկությունը, այլ ստանալով տեղեկություններ տեղամասերից՝ անմիջապես փորձել ենք կապ հաստատել իրավասու մարմինների հետ: Համատարած հոսանքազրկումներ եղել են մարզերում, քվեարկության օրը, երեկոյան ժամը 9-ի շրջանակներում, և տևել է 10-15 րոպե»:

Այլ անձի փոխարեն քվեարկելուն առնչվող Խունդկարյանի հարցին Մուկուչյանը պատասխանեց. «Ոչ մի դիմում չենք ունեցել, մինչև այսօր էլ չունենք»:

«Հայաստան» դաշինքի դիմումի հետ կապված էլ Խունդկարյանը հարցրեց. «Ի՞նչ գնահատական կտաք, այսպես ասած, լռության օրը վարչապետի պաշտոնակատարի հայտարարությանը, և նշվածի հետ կապված ի՞նչ գործողություններ եք կատարել դուք»:

Մուկուչյանը պատասխանեց. «Մենք դա դիտել էինք որպես լռության օրվա կանոնի խախտում, կատարել էինք նախազգուշացում, հետագայում դատարանը ոչ իրավաչափ համարեց մեր դիրքորոշումը: Ախր, եթե ասեմ, էլի կասեք՝ դատական ակտ եմ քննարկում»: