Պետական դավաճանության համար՝ 15-20 տարի կամ ցմահ ազատազրկում. առաջին ընթերցմամբ ընդունեց օրինագիծը

ՀՀ Ազգային ժողովն առաջին ընթերցմամբ ընդունեց Հայաստանի Հանրապետության քրեական օրենսգրքում փոփոխություններ կատարելու մասին օրենքի նախագիծը, որով առաջարկվում է առավելագույնս խստացնել պետական դավաճանության համար նախատեսված պատժաչափը: Նախագծի հեղինակներն են «Բարգավաճ Հայաստան» խմբակցության պատգամավորներ Վահե Էնֆիաջյանը, Նաիրա Զոհրաբյանը և Իվետա Տոնոյանը:

Նախագծի հեղինակներից ԲՀԿ-ական պատգամավոր Վահե Էնֆիաջյանի ներկայացմամբ՝ դավաճանության համար առաջարկվում է պատիժ սահմանել մինչև ցմահ ազատազրկում, իսկ լրտեսության համար՝ 15-20 տարի ազատազրկում: «Հայաստանի Հանրապետության և ժողովրդի նկատմամբ հանցանքն ամենածանրն է, որն էլ բնականաբար պետք է ունենա ամենածանր պատիժը»,- նշել է պատգամավորը։ 

ԱԺ պետաիրավական հարցերի հանձնաժողովում  առաջարկվել էր պետական դավաճանության դեպքում  նախատեսվի 15-20 տարի ժամկետով ազատազրկում՝ գույքի բռնագրավմամբ կամ առանց դրա կամ՝ ցմահ ազատազրկում: Իսկ լրտեսության համար պատժաչափի շեմը 15-ից իջեցնել 12 տարի:

Օրինագիծն առաջին ընթերցմամբ ընդունվեց 109 «կողմ», 2 «ձեռնպահ»  եւ 1 «դեմ»  ձայներով: