Քաղաքացիակենտրոն
լրատվություն

Բռնություն գործադրելով մարդ առևանգելու մեջ մեղադրվող Քաջարանի քաղաքապետի գործը մտավ դատարան

Բռնություն գործադրելով մարդ առևանգելու մեջ մեղադրվող Քաջարանի քաղաքապետի գործը մտավ դատարան
Իրավունք
12:47, 07 июнь 2021
Քաջարանի քաղաքապետի նկատմամբ հարուցված քրեական գործը մտավ դատարան: Քաղաքապետի հետ միասին դատվում են եւս երեք անձ: Վերոնշյալ քրեական գործը մակագրվել է դատավոր Բորիս Բախշիյանին:

Քաջարանի բնակչի և ընկերոջ միջև տեղի ունեցած վեճի հանգամանքները պարզաբանելու համար, Քաջարան համայնքի ղեկավարի կանչով, 2020թ. ապրիլի 26-ին՝ ժամը 20:00-ի սահմաններում, Քաջարանի Լեռնագործների փողոցում գտնվող, վերջինիս պատկանող բենզալցակայանի հետնամասում գտնվող չգործող նախկին ռեստորանի շինությունում հավաքվել են համայնքի ղեկավարը և շուրջ 20 հոգի, որտեղ տեղի է ունեցել ծեծկռտուք, որի ընթացքում Քաջարանի 30-ամյա բնակիչը բռունցքով պատասխան հարված է հասցրել համայնքի ղեկավարի հորը: Այս մասին ասվում էր քննչական կոմիտեի տարածած հաղորդագրությունում։

Ինչպես նշված է հաղորդագրությունում, հավաքված բազմության ներկայությամբ հորը հարվածելու համար 30-ամյա տղամարդուն ցուցադրաբար պատժելու և իր հեղինակությունը վերահաստատելու նպատակով Քաջարան համայնքի ղեկավարը, նախնական համաձայնության գալով մի խումբ անձանց հետ, 2020թ. ապրիլի 29-ին՝ ժամը 13:00-ի սահմաններում, Քաջարանի Լեռնագործներ փողոցի 18-րդ հասցեում գործող ավտոկայանատեղիում բռնություն գործադրելով՝ ոլորելով 30-ամյա տղամարդու ձեռքերը և բռնելով ոտքերից, նրա կամքին հակառակ մտցրել են նույն համայնքի մեկ այլ բնակչի կողմից վարած ավտոմեքենան, բացահայտ առևանգել են նրան ու դուրս հանելով բնական միկրոսոցիալական միջավայրից՝ տեղափոխել «Աժդանակ» ՍՊ ընկերության տարածք, որտեղ համայնքի ղեկավարը հրացանով կրակել է 30-ամյա տղամարդու ոտքերին, ծեծել նրան: Այնուհետև «Տոյոտա-Պրադո» մակնիշի ավտոմեքենայով վերջինիս տեղափոխել են Ագարակ բնակավայրում գտնվող առանձնատուն, որտեղ կրկին ծեծել են նրան:

Ձեռք բերված բավարար ապացույցների համակցությամբ՝ Քաջարան համայնքի ղեկավարին մեղադրանք է առաջադրվել՝ ՀՀ քրեական օրենսգրքի 131-րդ հոդվածի (Մարդուն  առևանգելը) 2-րդ մասի 1-ին կետով: Միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց ընտրելու մասին:

Հիշեցնենք, որ նշված քրեական գործի շրջանակներում մեղադրանք է առաջադրվել ևս 5 անձի: Խորեն Միրզոյանին մեղադրանք է առաջադրվել այն բանի համար, որ նա, Մանվել Փարամազյանի կազմակերպմամբ մի խումբ անձանց՝ Բաբկեն Համբարձումյանի, վերջինիս եղբոր՝ Լևոն Համբարձումյանի և Մարատ Ստեփանյանի հետ նախնական համաձայնությամբ, բռնության գործադրմամբ առևանգել են Շավարշ Մարգարյանին:

Բաբկեն Համբարձումյանին մեղադրանք է առաջադրվել այն բանի համար, որ նա, իր հարազատ Մանվել Փարամազյանի կազմակերպմամբ մի խումբ անձանց՝ եղբոր՝ Լևոն Համբարձումյանի, Մարատ Ստեփանյանի և Խորեն Միրզոյանի հետ նախնական համաձայնությամբ, բռնության գործադրմամբ առևանգել են Շավարշ Մարգարյանին:

Լևոն Համբարձումյանին մեղադրանք է առաջադրվել այն բանի համար, որ նա, Մանվել Փարամազյանի կազմակերպմամբ մի խումբ անձանց՝ եղբոր՝ Բաբկեն Համբարձումյանի, Մարատ Ստեփանյանի և Խորեն Միրզոյանի հետ նախնական համաձայնությամբ, բռնության գործադրմամբ առևանգել են Շավարշ Մարգարյանին: