Քաղաքացիակենտրոն
լրատվություն

Բաքվում նոր դատավարություն է սկսվում 2 հայ գերիների նկատմամբ՝ լրտեսության մեղադրանքով․ ՀԺ

Բաքվում նոր դատավարություն է սկսվում 2 հայ գերիների նկատմամբ՝ լրտեսության մեղադրանքով․ ՀԺ
Իրավունք
14:25, 06 июль 2021
Ադրբեջանում ևս երկու հայի դեմ հարուցված քրեական գործի քննությունն ավարտվել է: 

Դավիթ Տիգրանի Դավթյանը և Գևորգ Ռուբենի Սուջյանը մեղավոր են ճանաչվել Ադրբեջանի քրեական օրենսգրքի 276 հոդվածի (լրտեսություն) հատկանիշներով:

Ադրբեջանական լրատվամիջոցները հայտնում են, որ նախաքննությունն ավարտվել է, ու գործի նյութերը ուղարկվել են Բաքվի ծանր հանցագործությունների դատարան:

Քրեական գործը գտնվում է դատավոր Ալի Մամեդովի վարույթում: Գործով նախնական դատական առաջին նիստը տեղի կունենա հուլիսի 14-ին:

Նշենք, որ Գևորգ Սուջյանը (լուսանկարում) «Նոր Հայաստան Հայրենիք-Սփյուռք» բարեգործական ՀԿ հիմնադիր նախագահն է, որն ընկերոջ հետ գերեվարվել է հրադադարի հաստատումից հետո՝ նոյեմբերի 11-ին, երբ մեկնել է Արցախ:

Մի քանի օր նրանից տեղեկություն չի եղել, օրեր անց ադրբեջանական կողմի հրապարակած տեսանյութերից մեկում մտերիմները ճանաչել են նաև Սուջյանին ու նրա ընկերոջը՝ Դավթին։ Նրանք գերեվարվել են Բերձոր-Շուշի ճանապարհին:

Գևորգ Սուջյանը ռազմական գործողություններին չի մասնակցել, նա պատերազմի օրերին ընկերների հետ միասին օգնություն էր տեղափոխում Արցախ։ Երիտասարդը սոցիալական ցանցում ժամանակ առ ժամանակ տեղեկություն էր ներկայացում Արցախում տիրող իրավիճակի մասին։

Աղբյուր՝ armtimes.com