«Երբ իրենց ընտանիքի կողմից վճարվող մարդիկ են նման բաներ ասում, ես դա գնահատում եմ, որ դա պատվեր է: Իսկ երբ ինքը դժբախտ պատահարը փորձում է ներկայացնել որպես արարք, դա առնվազն սազական չէ մարդու, ով քաղաքականությամբ զբաղվելու հավակնություններ ունի: Շատ ցածր բան է մարդկանց դժբախտության վրա խաղալը և նման համեմատություն անելը»,- լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ ի պատասխան ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի կողմից երեկ դժբախտ պատահարը հիշատակելու վերաբերյալ լրագրողի հարցի:

Ալեն Սիմոնյանը ընդգծեց, որ վարչապետը մեքենան չի վարել, վարչապետը նման հրաման չի տվել՝ ի տարբերություն հայտնի դեպքերի:
Քրեական գործ հարուցվա՞ծ է, լրագրողի հարցին ԱԺ նախագահը պատասխանեց. «Իհարկե, դրանում որևէ մեկը կասկած ունի՞. քրեական գործ է հարուցված, քրեական գործով մեղադրյալ կա»:

ԱԺ նախագահը նշեց, որ ապարդյուն է հավասարության նշան դնել այդ դեպքի և այն արարքների միջև, որ հանրությունն իրենց է վերագրում. «Չփորձեն, մեր ձեռքերին արյուն չկա, հանկարծ իրենց հետ չխառնեն»: