Այսօր ուսանողներին չեն արգելում մասնակցել ցույցերի․ հարց է՝ ինչու են ցուցարարները որոշում մտնել համալսարանի տարածք ու հոգեբանական ճնշում գործադրել
Անդրանիկ Շիրինյանը ֆեյսբուքյան իր էջում գրել է․

Նախկին կուսակցականացված համալսարաններում մեծ ճնշում կար ակտիվ ուսանողների վրա քաղաքական գործընթացների չմասնակցել, հեռու մնալ հակաիշխանական ցույցերից: 

Կուսակցականացված էին ոչ միայն համալսարանների ղեկավարությունը, այլ նաև և մեծապես Ուսանողական խորհուրդները: Այսօր ուսանողներին որևէ մեկը չի փակում համալսարաններում ու արգելում մասնակցել ցույցերի: ԵՊՀ Ուսանողական խորհուրդն ակտիվորեն աջակցում է հակաիշխանական ցույցերին: Ավելին՝ նախկին ՈւԽ-ականներն ու ՈՒԽ նախագահներն են շարժման մասը կազմում: Սա իրենց իրավունքն է և որևէ կերպ չպետք է սահմանափակվի:

Մի հարց է, թե ինչու են ցուցարարները որոշում այնուամենայնիվ մտնել համալսարանի տարածք ու հոգեբանական ճնշում գործադրել ուսանողների վրա, ովքեր չեն մասնակցում ցույցերին:

Այս ամենից անկախ, այսօր տեսնում ու կարդում եմ մարդկանց, ովքեր երբևէ չեն մասնակցել որևէ քաղաքական, սոցիալական շարժումների, ակտիվորեն լծված այս օրերի շարժմամբ: Նրանց այսօր սկսել է անհանգստացնել մարդկանց ու կառույցների անտարբերությունը: Տարօրինակ է, որովհետև ժամանակին նրանք մասն էին այն կոնֆորմիստական համակարգի, որը խրախուսում ու գնահատում էր պասիվությունը: 
Հուսով եմ՝ սա քաղաքականացվելու, պետության մասին անկեղծորեն մտահոգվելու, և ոչ թե հերթական պատեհապաշտության դրսևորումն է