Եթե որոշ ընտրակեղծարարներ իրենց վտանգված զգան իմ այս հայտարարությունից, կարող են իմ դեմ հայց ներկայացնել. Վահագն Ալեքսանյան

«Արմեն Ռուստամյանն օգնեց ինձ հասկանալ, թե ուր են տանում ընդդիմության ելույթներն ու հարցերը: Փաստորեն ընդդիմությունը փորձում էր մեզ ասել, որ եթե այս ընտրությունները կեղծված չենք անվանում, ապա կեղծված չեն եղել նաև նախորդ ընտրությունները:

Իհարկե, շատ հետաքրքիր մոտեցում է, հատկապես որ հիմա մեզ դիտող ՀՀ քաղաքացիներից և ոչ մեկը անմասն չի եղել ընտրակեղծարարության այն փառահեղ կտավներին, որ ցուցադրել են դահլիճի այս հատվածում տեղակայված ուժերի առաջնորդները:

Օրինակ՝ անմասն չեն եղել ընտրատեղամասում ծեծվող հանձնաժողովականից: Կադրերը դեռ «Ա1+»-ում կան. Ռոբերտ Քոչարյանի առաջին անգամ նախագահ ընտրվելու օրերն էին, թե ինչպես գլուխը սեղանին խփեցին, ինչպես մազերից բռնեցին ու ինչպես տարան քվեատուփը»,- իր ելույթում հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը:

Նա նկատեց, որ պարոն Վարդևանյանը շատ է խոսում մուրճի մասին. «Բայց երբ պարոն Վարդևանյանի արդեն նախկին պաշտպանյալին հրավիրում էին բանավեճի, ասում էր՝ ինչ բանավեճ, ես դուելի եմ կանչում: Դուելի կանչողի համար մուրճից վախենալը մի քիչ չեմ պատկերացնում: Կամ 15-20 կասկածելի վարքուբարք ունեցող հոգու կողմից վարչապետի հասցեին ուղղված հայհոյանքները դարձնել «Սյունյաց ողջույն» արտահայտություն, և դա կպցնել սյունեցիներին: Չնայած սյունեցիները շատ հստակ պատասխանեցին, թե ով իրենց անունից ողջունելու տեղ ունի կամ չունի: Ով էլ կարծում է, թե դա իր ողջույնի ձևն է, կարծում եմ՝ կարող է համարել, որ իր ողջույնը առանք»:

Ինչ վերաբերում է վերջին ընտրություններին լռության օրվան, Վահագն Ալեքսանյանն ասաց. «Այդ օրը վերջապես դարձել է լռության օր, ոչ թե երեկոյան վերջին ընտրակաշառքները տներով բաժանելու օր»:

Նա անդրադարձավ նաև «Իմ քայլին» չընտրելու պարտադրանքներին և հեգնեց. «Այդ մարդը, հետաքրքիր ա, չագուչից չէ՞ր վախենում»:

Պատգամավորը հիշեց նաև «Իզմիրլյան» կենտրոնի բուժաշխատողներին և հարց բարձրացրեց. «Այդ բուժաշխատողներն ի վերջո ում ընտրեցին»:

Վահագն Ալեքսանյանը նշեց, որ ընդդիմությանը չի հաջողվի հավասարության նշան դնել այս վերջին խորհրդարանական ընտրությունների և նախկին ընտրությունների միջև. «Ես վստահ եմ, որ բոլոր ընտրակեղծարարների թաթիկներին, ձեռքերին, այլաբանական իմաստով, այդ կամ գուցե ուրիշ մուրճ, այնուամենայնիվ իջնելու է: Եթե որոշ ընտրակեղծարարներ իրենց վտանգված զգան, կարող են իմ դեմ հայց ներկայացնել»:

Հիշեցնենք, որ այսօր՝ սեպտեմբերի 13-ին, Ազգային ժողովում մեկնարկել է ԱԺ 8-րդ գումարման երկրորդ նստաշրջանի հերթական նիստը: Այժմ քննարկվում է Կենտրոնական ընտրական հանձնաժողովի գործունեության մասին հաղորդումը: