Վստահ եմ՝ անմեղսունակ չեք եղել օրենքին կողմ քվեարկելիս. Է, գրեիք, որ Շուռնուխից այն կողմ Շվեյցարիան է. Վահագն Ալեքսանյան

«Ընդդիմությունը չի ժխտում, որ 2010 թվականին ընդունել է Վարչատարածքային բաժանման մասին օրենքը, չի ժխտում, որ այստեղ նստել և կողմ է քվեարկել, որ Շուռնուխից այն կողմ գտնվում է Ադրբեջանի Հանրապետությունը: Չեն ժխտում որ այդ նախագիծը եկել է պրոֆիլային հանձնաժողով, որտեղ առաջարկ չեն ներկայացրել, թե եկեք չգրենք Ադրբեջան, այլ գրենք, որ Հայաստանի սահմանն ավարտվում է: Չեն ժխտում, ասում են՝ դրանով պետական սահմանը չի որոշվում»,- այսօր՝ հոկտեմբերի 5-ին, Ազգային ժողովի հերթական նիստում հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը և հեգնեց. «Չի որոշվում, է, գրեիք, որ Շվեյցարիան է գտնվում, ի՞նչ կլիներ որ, ավելի լավ չէ՞ր լինի»:

 «Կարծում եք, ՀՀ քաղաքացիներին կարելի է այդպես մոլորեցնե՞լ: Դուք ԱԺ պատգամավորներ եք եղել և պարտավորված եք եղել գործել խղճով, ՀՀ շահերից ելնելով: Ձեզ ինչ-որ մեկը սպառնացե՞լ է այդ օրենքին կողմ քվեարկելու համար: Վստահ եմ, որ ոչ, վստահ եմ նաև, որ այդ օրենքին կողմ քվեարկած պատգամավորներն անմեղսունակ չեն եղել: Դուք հիմա ուզում եք մեզ համոզել, որ ձեր քվեարկությունը ոչինչ չի նշանակում, բայց ամեն առիթով ուզում եք կոնտեքստից կտրել ինչ-որ արտահայտություն, որ կասի մեր քաղաքական թիմից որևիցե մեկը, միայն թե սպասարկի ձեր օրակարգը»,- հավելեց Վահագն Ալեքսանյանը: