Ես չեմ ուզում որևէ բողոք լսել. Պետական կառավարման համակարգում չպիտի լինի մարդ, որ պատվաստված չլինի. Վարչապետը՝ առողջապահության նախարարին

«Եվրոպական շատ երկրներ, Ասիայի երկրներ պատվաստումներն արդեն հասցրել են 90 տոկոսի»,- այսօր՝ հոկտեմբերի 7-ին, կառավարության հերթական նիստում հայտարարեց առողջապահության նախարար Անահիտ Ավանեսյանը և հավելեց. «Ուրեմն ինչի՞ դեմ են պայքարում այն անձինք, որոնք ցանկանում են, որ Հայաստանում պատվաստումների գործընթացը դանդաղի, ի՞նչ շահեր ունեն այդ մարդիկ»:

Վարչապետ Նիկոլ Փաշինյանը նկատեց, որ այդ մարդիկ քաղաքական շահեր են հետապնդում. «Նրանց պետք է, որ Հայաստանում հնարավորինս շատ մարդ մահանա, որպեսզի ասեն, որ կառավարությունը չի կարողանում կորոնավիրուսի դեմ պայքարել: Սա է նրա ուզածը»:

Վարչապետը նշեց, որ պետությունը ունի իր բոլոր լծակները, որպեսզի պատվաստման գործընթացը առաջ գնա. «Ես չեմ ուզում որևէ բողոք լսել, թե այդ գործընթացին խանգարում են: Եթե անհրաժեշտ է, պետք է օրենքներ ընդունել»:

Վարչապետը նկատեց, որ մարդիկ կան, ովքեր ուզում են, որ կորոնավիրուսի դեմ բուժումը վճարովի դառնա. «Ինչի պետք է մենք վճարենք հարկեր, և մարդիկ չգնան պատվաստվեն: Այդ գումարը կարող էր օգտագործվել դպրոցների վրա և հազարումի ծախսերի վրա: Նաև այսպիսի շարժում է սկսվում: Պատվաստման թվերը շատ վատ է, խնդիր ենք դրել՝ գնացեք լուծեք, և որևէ մեկից չբողոքեք: Դա վերաբերում է դահլիճում նստած բոլոր մարդկանց: Պետական կառավարման համակարգում չպիտի լինի մարդ, որ պատվաստված չլինի»: