Ընդդիմությունը մինչ այս պահը չի պատասխանել, թե իրե՛նք ինչ կանեին պատերազմից խուսափելու համար. Էդուարդ Աղաջանյան

ԱԺ արտաքին հարաբերությունների հանձնաժողովի նախագահ Էդուարդ Աղաջանյանը, այսօր՝ դեկտեմբերի 13-ին, «Քաղաքացիական պայմանագիր» խմբակցության խորհրդարանական ճեպազրույցների ժամանակ հղում անելով ԱԺ-Կառավարություն վերջին հարցուպատասխանի ժամանակ վարչապետ Նիկոլ Փաշինյանի հայտարարությանը, թե 2018 թվականի դրությամբ ստացած բանակցային  ժառանգային պայմաններում Արցախը Ադրբեջանի կազմից դուրս կարգավիճակ ունենալու որևէ գործնական և տեսական հնարավորություն չկար, և որ պատերազմից խուսափելու միակ հնարավորությունը տարածքների վերադարձն էր՝ առանց կարգավիճակի ճշգրտման, ասաց. «Վարչապետն առաջարկեց ընդդիմությանը հստակ պատասխանել, թե իրենք կոնկրետ ինչ քայլեր կձեռնարկեին այդ իրավիճակում պատերազմից խուսափելու համար: Ես կուզեմ արձանագրել, որ մինչ այս պահը մենք պատասխան չունենք»:

Էդուարդ Աղջանյանի խոսքով՝ ուստի այս թեմայի վերաբերյալ բոլոր պնդումներն ու հարցադրումները բացարձակապես այլ նպատակներ ունեն. «Մասնավորապես, կարևորագույն նպատակը հանրությանը մոլորության մեջ գցելն է»:

Նա նաև հավելեց, որ վարչապետն առաջարկել է փակ ձևաչափով հանդիպում ունենալ ընդդիմադիր գործընկերների հետ. «Ըստ էության Արծվիկ Մինասյանի այն հարցը, թե հրապարակային քննարկենք այս հարցը, փակ քննարկումից խուսափում է, որովհետև պարզ է, որ այդ տեղեկատվությունը պարունակելու է գաղտնի տեղեկատվություն: Հենց դրանով է պայմանավորված, որ բաց և հանրային քննարկումը մշտապես դրվում է մեր ընդդիմադիր գործընկերների կողմից: Գաղտնի տեղեկատվություն պարունակող քննարկումը բաց անելու հնարավորություն մենք չունենք՝ ըստ օրենքի»: