Վերջին մեկ տարում մենք անցանք 10 տարվա փորձությունների միջով. Նիկոլ Փաշինյանը՝ որպես գլխավոր բանակցող Ռուբեն Ռուբինյանի նշանակման մասին

Այսօր՝ դեկտեմբերի 24-ին, ՀՀ վարչապետ Նիկոլ Փաշինյանի առցանց ձևաչափով մամուլի ասուլիսին լրագրողները, անդրադառնալով Թուրքիայի հետ հարաբերությունների կարգավորման հարցով որպես ՀՀ ներկայացուցիչ Ռուբեն Ռուբինյանի նշանակմանը, հարցրել էին. «Արդյոք Ռուբինյանի դիվանագիտական հմտությունները և կարողությունները բավարա՞ր են նման բավականին բարդ գործընթացը նրան վստահելու համար: Մտավախություն չունե՞ք, որ հայկական կողմը կարող է տանուլ տալ այս գործընթացում՝ ներկայացուցչի փորձառության բացակայության պատճառով»:

Պատասխանելով հարցին՝ վարչապետ Նիկոլ Փաշինյանն ասաց. «Ես կարծում եմ, որ այս իրավիճակում այս բանակցություններում շատ կարևոր է, որ բանակցողը լինի քաղաքական իշխող թիմի ներկայացուցիչ: Սա կարևոր գործոն է»:

Նիկոլ Փաշինյանն ընդգծեց. «Հիմա շատ դժվար է մեր թիմի որևէ անդամի մասին ասել փորձառություն չունեցող: Մենք վերջին մեկ տարվա ընթացքում անցել ենք փորձությունների միջով, որը գուցե տասը տարվա փորձություն է»:

Վարչապետը նկատեց նաև, որ պարոն Ռուբինյանը միայնակ չի տանելու այդ պրոցեսը. «ԱԳՆ-ում մեր դիվանագիտական կորպուսից ձևավորվելու է թիմ, որն այդ ամբողջ պրոցեսն իրականացնելու է: Պարոն Ռուբինյանը լինելու է մեր գլխավոր բանակցողը, բայց դա չի նշանակում, թե մեր նախորդ փորձությունից ու փորձառությունից այս ամեն ինչը կտրված է լինելու»: