Քաղաքացիակենտրոն
լրատվություն

Բանագնացները վերահաստատել են՝ վերջնական նպատակը Հայաստանի ու Թուրքիայի միջև լիարժեք կարգավորումն է

Բանագնացները վերահաստատել են՝ վերջնական նպատակը Հայաստանի ու Թուրքիայի միջև լիարժեք կարգավորումն է
Քաղաքականություն
17:22, 24 февраль 2022
Վիեննայում այսօր տեղի է ունեցել Հայաստանի և Թուրքիայի միջև հարաբերություների կարգավորման գործընթացի հատուկ ներկայացուցիչներ Հայաստանի Ազգային ժողովի նախագահի տեղակալ Ռուբեն Ռուբինյանի և դեսպան Սերդար Քըլըչի հանդիպումը:

Հայաստանի արտգործնախարարության փոխանցմամբ, հատուկ ներկայացուցիչները վերահաստատել են, որ բանակցությունների վերջնական նպատակը Հայաստանի ու Թուրքիայի միջև լիարժեք կարգավորումն է, ինչպես պայմանավորվել էին Մոսկվայում իրենց առաջին հանդիպման ընթացքում:

«Նրանք մտքեր են փոխանակել այդ կապակցությամբ համատեղ հնարավոր կոնկրետ քայլեր ձեռնարկելու շուրջ և վերահաստատել իրենց համաձայնությունը՝ գործընթացը շարունակելու առանց նախապայմանների», - ասված է Հայաստանի արտաքին գերատեսչության հաղորդագրությունում:

Հանդիպումից հետո նույնպիսի հաղորդագրություն է տարածել նաև Թուրքիայի արտգործնախարարությունը։

Անցյալ տարեվերջին Երևանն ու Անկարան հարաբերությունները կարգավորելու պատրաստակամություն հայտնեցին, երկուստեք հատուկ ներկայացուցիչներ նշանակեցին։ Ռուբեն Ռուբինյանի և Սերդար Քըլըչի առաջին հանդիպումը Մոսկվայում էր՝ 2022-ի հունվարի 14-ին։ Հանդիպումից հետո Հայաստանի և Թուրքիայի արտգործնախարարությունները հայտարարեցին, որ կողմերը համաձայնել են շարունակել լիարժեք կարգավորմանն ուղղված բանակցությունները՝ առանց նախապայմանների՝ ընդգծելով, որ հանդիպումն ընթացել է դրական և կառուցողական մթնոլորտում։

Աղբյուր՝ azatutyun.am