Մինսկի խմբի համանախագահող երեք երկրներն էլ հաստատել են իրենց հանձնառությունը ԼՂ կարգավորման հարցում. Փաշինյան

«Մինսկի խումբը գոյություն ունի՞, թե՝ ոչ: Ըստ Լավրովի հայտարարությունների՝ այն գոյություն չունի, այս դեպքում որտե՞ղ է արցախյան հիմնախնդրի բանալին»,-այսօր` հունիսի 27-ին, լրատվամիջոցներն ու ՀԿ-ները նաև այս հարցն էին ուղղել ՀՀ վարչապետ Նիկոլ Փաշինյանին հեռավար ասուլիսի ժամանակ: 
 
«Ադրբեջանի նախագահի հայտարարություններին նախկինում առիթ ունեցել եմ անդրադառնալու, բայց պետք է ասեմ, որ ՌԴ արտաքին գործերի նախարարի հայտարարությունը, եթե լրատվամիջոցները ճիշտ են վերարտադրել, մեղմ ասած, տարօրինակ հայտարարություն է, որովհետև ՌԴ արտաքին գործերի նախարարը ՌԴ նախագահի ենթակայության տակ և նրա որոշումների ներքո և շրջանակներում գործող պաշտոնյա է: 2021թ. ապրիլի 19-ին ես պաշտոնական այց եմ ունեցել ՌԴ, որի արդյունքներով ՌԴ նախագահի հետ ստորագրել ենք համատեղ հայտարարություն, որտեղ գրված է` պետք է համագործակցենք ԼՂ կարգավորման շուրջ, պետք է օգտագործենք ԵԱՀԿ Մինսկի խմբի համանախագահության պոտենցիալը նրա միջազգային մանդատին համապատասխան: Եվ սա ՌԴ պաշտոնական տեսակետն է, որն արձանագրված է թղթի վրա»,-պատասխանեց վարչապետն ու ընդգծեց, որ մի կողմից կարծում է, որ առկա հակասությունը պետք է պարզաբանվի, մյսու կողմից էլ ՌԴ-ի պաշտոնական դիրքորոշումն արդեն իսկ արձանագրված է. «Մինսկի խմբի համախագահող երեք երկրներն էլ հաստատել են իրենց հանձնառությունը` Ռուսաստանը, ԱՄՆ-ը, Ֆրանսիան և վերջին երկուսը մի քանի անգամ: Մինսկի խումբը չի հայտարարել իր չգոյության մասին»,-հավելեց Փաշինյանը: