Զախարովան ՄԱԿ ԳԱ-ում Բայդենի ելույթը համարել է «անպարկեշտ», իսկ Պուտինի ելույթի մեջբերումը՝ «կեղծ»

ՌԴ ԱԳՆ պաշտոնական ներկայացուցիչ Մարիա Զախարովան «անպարկեշտ» է անվանել ԱՄՆ նախագահ Ջո Բայդենի ելույթը ՄԱԿ-ի Գլխավոր ասամբլեայի 77-րդ նստաշրջանի ամբիոնից, որի ժամանակ, Զախարովայի խոսքով, նա կեղծ մեջբերումներ է կատարել ՌԴ նախագահ Վլադիմիր Պուտինի ելույթից միջուկային սպառնալիքի մասին։

«Ինչ վերաբերում է ԱՄՆ նախագահի ելույթին, ապա ես բացարձակ անպարկեշտ եմ համարում այն, ինչով այն սկսվեց, և այն, ինչը դարձավ մեյնսթրիմ, քանի որ այն կառուցվել է մեր երկրի շուրջը: Բանն այն է, որ նա սկսել է իբր մեջբերելով Ռուսաստանի նախագահին։ Նա Ռուսաստանի նախագահին է վերագրել խոսքեր, թե մեր երկիրը սպառնում է աշխարհին միջուկային զենքով»,- ասել է նա հինգշաբթի «Սոլովյով Live»-ի ուղիղ եթերում։
 
Զախարովան նշել է, որ նման դիրքորոշումը «քարոզչական կապ է, որը փաթաթվում է հանրության վզին, չնայած այն ամենին, ինչ իրականում ասվել է»։ «Հենց այս դիրքորոշումն է, ցավոք, այժմ կրկին մատուցվում արևմտյան լրատվամիջոցներում: Եվ ԱՄՆ նախագահը ամրապնդեց այն, ինչը թափ է հավաքում ամերիկյան լրատվամիջոցներում»,- նշել է դիվանագետը։

Ավելի վաղ Բայդենը ՄԱԿ-ի Գլխավոր ասամբլեայում  իր ելույթում պնդել էր, որ Մոսկվան հանդես է եկել «միջուկային զենք օգտագործելու բացահայտ սպառնալիքներով ընդդեմ Եվրոպայի և չտարածման ռեժիմի պարտավորությունների անխոհեմ արհամարհանքով»։ Ինչպես միաժամանակ հավաստիացրել է նա, ԱՄՆ-ը հասկանում է, որ միջուկային պատերազմում հաղթողներ չեն կարող լինել, և որ այն երբեք չպետք է սանձազերծվի։ Բացի դրանից, Բայդենը խոստացել է, որ ԱՄՆ-ն պատրաստ կլինի ձեռնարկել սպառազինության վերահսկման «ծայրահեղ կարևոր» միջոցներ՝ անկախ նրանից, թե ինչ տեղի կունենա աշխարհում։