Ընդդիմադիր ուժերի այս գործելաոճը ինձ համար առհասարակ ընկալելի չէ․ Ռուբեն Մելքոնյանը չի վերցնի մանդատը

«Հայաստան» դաշինքի ցուցակով պատգամավորի թեկնածու առաջադրված ԵՊՀ Արևելագիտության ֆակուլտետի դեկան Ռուբեն Մելքոնյանը ֆեյսբուքյան իր էջում գրառում է արել՝ տեղեկացնելով, որ չի վերցնելու մանդատը։

Հիշեցնենք, որ դաշինքի պատգամավորներ Վահե Հակոբյանը, Հռիփսիմե Ստամբուլյանը և Ելենա Կիրակոսյանը մանդատից հրաժարվել էին։


«- 2020 թ. համազգային աղետից հետո, առավել քան երբևէ, կարիք կար հասարակության տարբեր շերտերի գիտելիքների, հմտությունների համախմբման՝ հանուն պետականության և հանուն պետականության անկումը կանխելու: Լինելով և շարունակելով մնալ անկուսակցական՝ որոշում էի կայացրել իմ մասնագիտական գիտելիքները բացի գիտա-կրթական ոլորտից, ծառայեցնել նաև ավելի գործնական, այդ թվում և՝ քաղաքական դաշտում, քանզի ստեղծված օրհասական իրավիճակում զուտ գիտա-կրթական գործունեությամբ պարփակվելը համարել և համարում եմ խուսափողականություն, իսկ հարմարվողական մտավորականությանը՝ մեծագույն աղետ պետության համար: Ուստի, մասնակցել եմ 2021 թ. խորհրդարանական ընտրություններին այս իշխանություններին այլընտրանք հանդիսացող ընդդիմադիր «Հայաստան» դաշինքի ցուցակով: Դա բացի քաղաքականից, միևնույն ժամանակ, իմ քաղաքացիական քայլն էր»,- մասնավորապես գրել է Մելքոնյանը, ապա հավելել, որ վաղը մանդատից հրաժարվելու դիմում կներկայացնի ԿԸՀ: