Քաղաքացիակենտրոն
լրատվություն

Ես ափսոսում եմ, որ մենք էդ շարժման մեջ էինք. էլ ՀԱԿ չկա, Լեւոն Տեր-Պետրոսյանը թաղեց. ՀԺԿ քարտուղար. armtimes.com

Ես ափսոսում եմ, որ մենք էդ շարժման մեջ էինք. էլ ՀԱԿ չկա, Լեւոն Տեր-Պետրոսյանը թաղեց. ՀԺԿ քարտուղար. armtimes.com
Քաղաքականություն
22:48, 07 май 2021
Armtimes.com-ի Հարցազրույց «Հայաստանի ժողովրդական կուսակցության» (ՀԺԿ) քարտուղար Գրիգոր Հարությունյանի հետ.

- Պարոն Հարությունյան, ներքաղաքական կյանքում բավական հետաքրքիր զարգացումներ են տեղի ունենում: Ձեր կուսակցությունը ՀԱԿ դաշինքի կազմում մեծ ճանապարհ է անցել առաջին նախագահի հետ: Ծանո՞թ եք Լեւոն Տեր-Պետրոսյանի վերջին նախաձեռնություններին՝ Ռոբերտ Քոչարյանի եւ Սերժ Սարգսյանի հետ դաշինք կազմելու վերաբերյալ, ինչպե՞ս եք հասկացել այդ հայտարարությունները: Ինչո՞ւ եմ հարցնում, որովհետեւ ՀԱԿ ներկայացուցիչները բոլորին ասում են, որ սխալ են հասկացել առաջին նախագահի քայլը, տողատակերը չեն կարդացել:

- Ի՞նչ տողատակեր, հիմա արդեն պարզ խոսելու ժամանակն է: Ինձ համար ցավալի է, որ մենք այդպիսի փաստի առաջ ենք կանգնել, չէի սպասում. ո՞նց կարելի է հանցագործների հետ ինչ-որ ճանապարհ գնալ:

- Ասում է՝ «փաշինյանական հանցավոր եւ ազգակործան վարչախմբի վերարտադրման վտանգի կանխման եւ նորանոր աղետներից խուսափելու միակ միջոցն այս պահին հանրապետության երեք նախկին նախագահների դաշինքը կլիներ»: 

- Բայց ինչի՞ ազգակործան, ես դա չեմ ընդունում, ի՞նչն է ազգակործան, երկիրը կործանել են, տվել Նիկոլին, հիմա նոր հույս է առաջացել ժողովրդի մոտ, որ մի բան պիտի փոխվի, ուզում են հե՞տ բերել նախկիններին: Ամեն ինչ պիտի արվի, որ հանցագործները հետ չգան:

- Տեր-Պետրոսյանի հայտարարությունից տպավորություն եք ստացել, որ հանցագործներին ուզում է հե՞տ բերել:

- Ես ենթադրություններ կարող եմ անել՝ ենթադրություն, որ իրենք միասին են եղել այս ընթացքում: Ի՞նչ է, մենք էլ խաբվե՞լ ենք, հետը գնացե՞լ:

- Այդպիսի տպավորությո՞ւն եք ստացել:

- Հա, բա ո՞նց կարելի է Քոչարյանին էսօր պաշտպանել: Քոչարյանի ամբողջ քաղաքականությունը թրքամետ քաղաքականություն է եղել էս տարիների ընթացքում, ամեն ինչ արել է ի վնաս Հայաստանի եւ հայ ժողովրդի: Ինքը Ղարաբաղին դուրս թողեց բանակցություններից, իրենք ոչինչ չարեցին Ղարաբաղը ուժեղացնելու համար, իրենք ոչինչ չարեցին, որ էդ թալանածը գոնե դնեին, առաջնագծում ամրություններ ստեղծեին, որ ռմբակոծության ժամանակ էդ էրեխեքը չզոհվեին: Չէ, ինչի մասին է խոսքը, էսօր ով դուրս գա Քոչարյան Ռոբերտին պաշտպանի, նա ազգի դավաճան է: Մի քանի թափթփուկ էլ մեզ մոտ կան՝ Ագարակում, Մեղրիում, իրենց բոլորին պիտի լուրջ գնահատական տրվի: Ես էսօր Փաշինյանին մեղադրում եմ նրանում, որ հեղափոխությունից հետո քաղաքական գնահատական չտվեց ՀՀԿ-ին, Քոչարյանին: Ասում է վենդետա, ի՞նչ վենդետա, դա վենդետա չէր լինի, հանցագործներին դնում են իրենց տեղը: Ժողովուրդն իր գնահատականը տվել էր, մնում էր «Իմ քայլը» հայ ժողովրդի տված քաղաքական գնահատականը վերածեր իրավական գնահատականի:

- Տեր-Պետրոսյանը հայտարարեց, որ մայիսի 1-ին հանդիպել է Սերժ Սարգսյանի հետ՝ նրան առաջարկելով գոնե ՀՀԿ-ՀԱԿ ձեւաչափով գնալ ընտրությունների: Համացանցում կատակներ են անում, որ շուտով նաեւ ՔՊ-ին է առաջարկ անելու...

- Չեմ հասկանում էդ մարդուն, կորոնավիրուսը ազդեցություն է ունեցել վրան, ինչ է արել: Չեմ հաս-կա-նում: Եվ ափսոսում եմ, որ մենք էդ շարժման մեջ էինք, էդքան մարդ հավատացել էր, Մարտյան դեպքերը եղավ, էդքան մարդ իրենց կյանքը վտանգի տակ էին դրել. լրիվ անհասկանալի պահեր են:

- Ձեր կուսակցությունը ընտրություններին մասնակցելո՞ւ է:

- Դեռ որոշում չկա:

- Հնարավո՞ր է ՀԱԿ-ի ցուցակով գնաք, թե՞ արդեն կարելի է բացառել:

- Բացառվում է: ՀԱԿ-ը վերջացավ, էլ ՀԱԿ չկա, Լեւոն Տեր-Պետրոսյանը թաղեց: Մեկը մենք, ՀԱԿ-ի հետ գործ չունենք:

- Դուք դա կուսակցության անունի՞ց եք ասում:

 - Ես էսօր իմ անունից եմ ասում, բայց համոզված եմ, որ մեր կուսակցականների 90 տոկոսն էդ կարծիքին է: Որովհետեւ ես Մարտի 1-ը չեմ կարող մոռանալ, ես վերջին մարդկանցից եմ եղել, որ էդ հրապարակից գնացել եմ:

- Իսկ ո՞վ է ուզում մոռանալ:

- Դե էդ հայտարարությունը վիրավորանք էր 10 զոհերին, հարյուրավոր վիրավորներին, վիրավորանք էր էդ մարդկանց նկատմամբ: Հոկտեմբերի 27-ը ես չեմ կարող մոռանալ եւ ոչ էլ ՀԺԿ-ն կարող է մոռանալ:

- Ձեր կուսակցության ղեկավարի՝ Ստեփան Դեմիրճյանի հետ խոսե՞լ եք:

- Բացառվում է, որ Դեմիրճյանը մոռանա Հոկտեմբերի 27-ը եւ պաշտպանի մի հանցագործ խմբի: Միանշանակ մենք դատապարտում ենք ու դատապարտել ենք այս նախաձեռնությունը: Եվ մեզ համար լրիվ անընդունելի է խուլիգանների միասնությունը: Լեւոն Տեր-Պետրոսյանի ասածը լրիվ անհասկանալի բան է մեր կուսակցության համար:

- Կան կարծիքներ, որ հունիսի 20-ին պայքարը գնալու է Նիկոլ Փաշինյանի եւ Ռոբերտ Քոչարյանի միջեւ: Հատկապես որ սյունեցի եք, որտեղ, ըստ որոշ գնահատականների, Քոչարյանն ամենամեծ շանսերն ունի, համամի՞տ եք այդ կարծիքի հետ:

- Քոչարյանը զրո է, նրա անունը ժողովուրդը լսում է՝ հերիք է: Քոչարյանը ո՞նց կարող է շանս ունենալ: Ինչի մեր ազգի հիշողությունն այդքան կա՞րճ է:

- Բայց նրան միացել է Վահե Հակոբյանը, որը Սյունիքում ...

- Հեքիաթ է, հե-քիաթ, Սյունիքում ոչ մի բան չունի: Ես հիմա Սյունիքում եմ, չէ՞, 10 տոկոս եթե ձայն հավաքեն Սյունիքում՝ պիտի գոհ լինեն: ժողովուրդը ո՞նց Քոչարյանին կընդունի: Կամ Վահե Հակոբյանը ի՞նչ է, բա էս ժողովուրդը չի՞ տեսնում, որ էդպիսի խուլիգանություններով, էդպիսի բաներով...ո՞նց կարող են դրա հետեւից գնալ: Մենակ մի ձեւ ունեն՝ Քաջարանի կոմբինատը: Էստեղ պիտի շատ լուրջ հսկողություն դրվի իրավապահների կողմից, որ էդ մաֆիոզներին կանխեն: Հիմա ես ունեմ ինֆորմացիա, որ իրենք չեն երեւում, փորձում են զանգել, համոզել, փող բաժանել: Պարզապես պիտի լավ ուժային միջոցներ օգտագործեն, որ ընտրությունները չկեղծեն, վերջ: Փաշինյանին ժողովուրդը շատ լավ հասկանում է, ընդունում է:

- Բայց Սյունիքի մարզ այցի ժամանակ ցույց տվեցին, որ այդպես չէ:

- Այցի ժամանակ ի՞նչ էր, բա հանցագործները պատրաստվել են, մի 20-30 հոգի, կազմակերպել էին, էդ խուլիգանությունը արեցին: Ժողովուրդը չէր իմանում, որ Փաշինյանը գալու է, բայց էդ 20-30 հոգին գիտեին: Մեկը ես՝ Մեղրիում էի, չգիտեի: Փաշինյանը եկավ, մեքենայի վրա տվեցին: Ես դա էլ չեմ ընդունում, որ ոստիկանները ոչինչ չարեցին, պիտի հավաքեին տանեին դրանց: Չուզեցան, որ սրվի վիճակը, մտածեցին՝ հեսա ժողովուրդը դուրս ա գալու, դրանց պաշտպանի: Նման բան չկա, բոլորը դատապարտում էին:

Մանրամասները՝ սկզբնաղբյուրում։