Քաղաքացիակենտրոն
լրատվություն

Պաշտպանության եւ անվտանգության հարցերի մշտական հանձնաժողովի արտահերթ նիստում 2-րդ ընթերցմամբ դրական եզրակացություն է ստացել 3 նախագիծ

Պաշտպանության եւ անվտանգության հարցերի մշտական հանձնաժողովի արտահերթ նիստում 2-րդ ընթերցմամբ դրական եզրակացություն է ստացել 3 նախագիծ
Քաղաքականություն
19:30, 13 апрель 2023
Վարժական հավաքների ու զորահավաքային զինծառայության զորականչված զինծառայողների նկատմամբ կիրառվող խրախուսանքներն ու կարգապահական տույժերն ու տեսակները կհստակեցվեն: Այս մասին ասել է Պաշտպանության նախարարի տեղակալ Արման Սարգսյանը՝ ԱԺ պաշտպանության եւ անվտանգության հարցերի մշտական հանձնաժողովի` ապրիլի 13-ի արտահերթ նիստում:

Երկրորդ ընթերցմամբ քննարկման է ներկայացվել ««ՀՀ ԶՈՒ կարգապահական կանոնագիրք» օրենքում փոփոխություններ ու լրացումներ կատարելու մասին», ««Զիվորական ծառայության եւ զինծառայողի կարգավիճակի մասին» օրենքում փոփոխություններ ու լրացումներ կատարելու մասին» եւ «Վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին» նախագծերի փաթեթը:

Տեխնիկական ու բովանդակային փոփոխություններ են արվել նաեւ «Ոստիկանությունում ծառայության մասին» եւ «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքներում: Ներքին գործերի նախարարի տեղակալ Արփինե Սարգսյանը նշել է, որ հանձնաժողովի փոխնախագահ Արմեն Խաչատրյանի՝ ոստիկանապետի ու տեղակալների ատեստավորման մասին առաջարկն ընդունելի է գերատեսչության համար:

««Փրկարար ծառայության մասին» ու «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքներում փոփոխություններով եւ լրացումներով էլ կատեստավորվեն նաեւ Փրկարար ծառայության տնօրենն ու տեղակալները»,- նշել է ՆԳ փոխնախարարը:

Հանձնաժողովը բոլոր նախագծերին տվել է դրական եզրակացություն: