Հայաստանում խաղաղ կարգավորումը տապալելու մասին մեղադրանքները այլ բան չեն, քան Ադրբեջանի ագրեսիայի հիմնավորում ու արդարացում․ քաղաքական վերլուծաբան

Քաղաքական մեկնաբան Հակոբ Բադալյանը իր ֆեյսբուքյան էջում գրել է․

«Ադրբեջանը կարծում եմ հաճույքով է հետեւում, թե ինչպես են Հայաստանի ներքաղաքական պայքարում հնչում խաղաղ կարգավորումը տապալելու մեղադրանքներ: Ընդ որում բոլորովին կարեւոր չէ, թե ով ում հասցեին է դա հնչեցնում: Հայաստանում խաղաղ կարգավորումը տապալելու մասին մեղադրանքները այլ բան չեն, քան Ադրբեջանի ագրեսիայի հիմնավորում ու արդարացում: Հասկանու՞մ են դա անողները: Իհարկե հասկանում են: Բայց նրանց համար դա կարեւոր չէ: Կարեւոր են անձնական հավակնությունները, եւ գլխավորը՝ կարեւոր է Ռուսաստանին մաքրելը, թեկուզ դա արվում է Ադրբեջանին «մաքրելու» գնով:

Կրկնեմ, ներքին շրջանառության «հեքիաթ» է, թե Վազգեն Սարգսյանը, Սերժ Սարգսյանը կամ Ռոբերտ Քոչարյանը հանկարծ իրենք իրենց ընդվզեցին Տեր-Պետրոսյանի դեմ ու իրենց անհամաձայնությամբ տապալեցին կարգավորումը: 

1996 թվականի նախագահի ընտրությունից հետո Ռուսաստանում սրվել էր իշխանության հարցը, որովհետեւ վերնախավի համար պարզ էր՝ Ելցինը սրընթաց դառնում է անկենսունակ: Այդ շրջանում, Արցախի հարց կարող էր կարգավորվել կամ առանց Ռուսաստանի, կամ Ռուսաստանը իր ամբողջ ներուժն օգտագործելու էր իր երկրորդական դերով կարգավորում թույլ չտալու համար: Իսկ ինչպե՞ս, ու՞մ վրա էր առավելագույնը տարածվում Ռուսաստանի ներուժը՝ իհարկե Հայաստանի:

Ըստ այդմ, պետք է թերեւս կամ «իրերը կոչել իրենց անուններով, ինչպես իր 2007 թվականի հոկտեմբերի 23-ի հանրահավաքի ելույթը վերնագրել էր ակտիվ քաղաքականություն վերադարձող Առաջին նախագահ Տեր-Պետրոսյանը, կամ վերջ տալ գոնե այդ հարցում ոչ լրիվ ճշմարտություններ ասելով պատերազմի պատասխանատվությունը Հայաստանի վրա դնելուն:

Հայաստանի վրա է ավելի քան քառորդ դար աշխարհաքաղաքական վերափոխման եւ պատերազմի սպառնալիքի անհամարժեք գնահատման եւ դրան պատրաստ չլինելու պատասխանատվությունը»: