Անկլավների վերաբերյալ վերջնական համաձայնեցում չկա, կան մտքեր, որոնցից ոչ մեկը մերժված չէ. Հարցը դիտում ենք խաղաղությա՞ն, թե՞ պատերազմի մեջ. վարչապետ

«Անկլավների թեման քաղաքական մակարդակում գոյություն է ունեցել միշտ և շատ վաղուց: Սա շատ կարևոր է»,- այսօր՝ մայիսի 24-ին, ԱԺ-Կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը՝ պատասխանելով ՔՊ խմբակցության պատգամավոր Ծովինար Վարդանյանի հարցին առ այն, որ այս թեմայով բազմաթիվ շահարկումներ կան: 
Վարչապետի խոսքով՝ 1999 թվականի տարածքների փոխանակման մասին հրապարակված փաստաթղթի 4-րդ հոդվածը նվիրված է Հայաստանի և Ադրբեջանի անկլավներին:

«Հարցն ունի քաղաքական և իրավական կողմ: Քաղաքական մակարդակում Մյունխենում և Բրյուսելում եղել է հետևյալ խոսակցությունը. մենք փոխադարձաբար ճանաչում ենք անկլավների գոյությունը, այսինքն՝ որ կա Արծվաշեն, որը պատկանել է ՀՀ-ին, և Հայաստանի տարածքում կան անկլավներ, որոնք պատկանել են Ադրբեջանին: Այո, քաղաքական մակարդակում դա մենք ճանաչում ենք, իսկ իրավական մակարդակում մենք հարցեր ունենք առնվազն դրանցից մի քանիսի հետ կապված»,- պարզաբանեց վարչապետը:

Նիկոլ Փաշինյանը նշեց, որ լուծման երկու տարբերակ կա. «Որը սահմանից այն կողմ է, մնում է սահմանից այն կողմ գտնվող տարածքում, որը սահմանից այս կողմ է, մնում է սահմանից այս կողմ գտնվող երկրի տարածքում: Իսկ եթե մենք ասենք՝ Արծվաշենը չենք ուզում, մյուսները թող մնան, այստեղ էլ իրավական հարցեր, նրբություններ կան, որոնք պարզ չեն: Սա այն տեղն է, որտեղ ճկունության շատ մեծ տեղ կա»:

Վարչապետն ընդգծեց, որ նախ որևէ բան որոշված չէ. «Եթե հստակ պայմանավորվածություն լինի Ադրբեջանի հետ, ես կգամ կասեմ, որ այդ հարցի լուծումը այսպես է՝ հստակ պայմանավորվել ենք: Այս թեմայի վերաբերյալ վերջնական համաձայնեցում չկա, կան մտքեր, գաղափարներ, որոնցից ոչ մեկը մերժված չէ»:

Վարչապետը ասաց, որ վերջերս Տավուշի մարզ կատարած այցի ընթացքում կանգ է առել Ոսկեպարում, որտեղ գյուղացիներին դարձյալ ասել է, որ կան տարբեր տարբերակներ, բայց առայժմ ոչ մի հստակություն չկա:

Նիկոլ Փաշինյանը հավելեց. «Մեծ հաշվով հարցը հետևյալի մասին է. այդ հարցը դիտում ենք խաղաղությա՞ն, թե՞ պատերազմի մեջ: Եթե խաղաղության մեջ՝ հարցն այդքան ծանր չէ, եթե պատերազմի մեջ՝ դա ծայրահեղ ծանր հարց է»:

Մանրամասն՝ տեսանյութում