Հայ գերիների վերադարձին միջնորդելը մեր քաղաքականության կարևորագույն հաղթանակն է. Վրաստանի վարչապետ

Մեր քաղաքականության կարևորագույն հաղթանակը մեր միջնորդությամբ ու ԱՄՆ-ի աջակցությամբ Ադրբեջանում պահվող հայ ռազմագերիներին ազատ արձակելու համաձայնությունն է: 

Այս մասին ասել է Վրաստանի վարչապետ Իրակլի Ղարիբաշվիլին խորհրդարանում ամենամյա զեկույցը ներկայացնելիս․ գրում էaliq.ge-ն: 

«Սա աննախադեպ իրադարձություն է, որ ընդգծում է մեր հատուկ դերը` տարածաշրջանում խաղաղության ապահովման հարցում»,- ասել է նա:

Ըստ կառավարության ղեկավարի` Լեռնային Ղարաբաղի պատերազմը ողջ տարածաշրջանին որոշ դժվարությունների առաջ է կանգնեցրել։ Վրաստանի համար էական է հարևան երկրներում խաղաղությունն ու կայունությունը։

Ղարիբաշվիլին խորհրդարանի ամբիոնից ևս մեկ անգամ շնորհակալություն է ասել պատերազմող երկրների առաջնորդ Փաշինյանին և Ալիևին` պատրաստակամություն հայտնելով շարունակել գործել ի նպաստ համընդհանուր խաղաղության ու կայունության։