«Օնիկ Գասպարյանը հեռանում է, և սկսում ենք խորհրդակցություններ՝ քաղաքական բոլոր ուժերի հետ»․ Փաշինյանի առաջարկը

ՀՀ ԶՈՒ ԳՇ հայտարարությանից հետո Հանրապետության Հրապարակում ունեցած այսօրվա ելույթում վարչապետ Նիկոլ Փաշինյանը, անդրադառնալով իր հրաժարականի պահանջին՝ Փաշինյանն ասաց․ «Պատերազմից հետո չե՞մ մտածել, որ պետք է հրաժարական տամ, մտածել եմ, շատ եմ մտածել, բայց ես ասել եմ մի բան, ես իմ կամքով չէ, որ դարձել եմ ՀՀ վարչապետ, և ժողովուրդը պետք է իմ հեռացման հարցը որոշի։ Թող ժողովուրդը ինձ դատապարտի, թող ժողովուրդն ինձ գնդակահարի»,-հայտարարեց Փաշինյանը՝ հավելելով, որ ոչ մի դեպքում իր ընտանիքը չի պատրաստվում լքել Հայաստանը։ 

«Էլի խորհրդարանական ուժերին ասում եմ՝ եկեք իրար հետ օրը, ժամը որոշենք, եկեք կոնսուլտացիաներ սկսենք արտահերթ ընտրությունների թեմայով»,-կոչ արեց վարչապետը՝ հավելելով, որ հեռախոսազրույց է ունեցել հանրապետության նախագահի հետ և հարց է ուղղել՝ եթե հանրապետության նախագահը Օնիկ Գասպարյանի ազատման միջնորդությունը չի ստորագրում, նշանակում է՝ միանո՞ւմ է պետական հեղաշրջմանը։ 

Վարչապետն ասաց, որ 100 տոկոս վստահությամբ է վերաբերվել շատերին, այդ թվում Օիկ Գասպարյանին հատկապես պատերազմի ընթացքում։ Ապա վարչապետն առաջարկեց․ «Զինված ուժերը, նաև այն մարդիկ, ովքեր ստորագրել են հայտարարությունը, զբաղվում են ՀՀ սահմանների պահպանմամբ, Օնիկ Գասպարյանը հեռանում է, հրաժարական է տալիս կամ նախագահն է ստորագրում նրա ազատման հրամանը, և քաղաքական ուժերը գալիս են խորհրդակցությունների»։