«Չի կարող ԳՇ պետի պաշտոնավարումը լինել քաղաքական բանակացությունների առարկա»․ Ռուբեն Ռուբինյան

«Դա տրամաբանական առաջարկ չէ մի պարզ պատճառով. ես ճի՞շտ եմ հասկանում՝ փաստացի այդ առաջարկով Էդմոն Մարուքյանը նորմալ է համարում, որ ԳՇ պետը կամ տեղակալը պիտի դառնա քաղաքական պայմանավորվածության մաս»,- այս մասին լրագրողների հետ զրույցում ասաց «Իմ քայլի» պատգամավոր Ռուբեն Ռուբինյանը՝ արձագանքելով ԼՀԿ խմբակցության ղեկավար Էդմոն Մարուքյանի կոչին, որով նա առաջարկել էր, որ Նիկոլ Փաշինյանը չեղյալ  համարի ԳՇ պետ օնիկ Գասպարյանին պաշտոնից ազատելու իր որոշումը։

«Այդպես չի կարող լինել, եւ դա չի կարող նախապայման լինել արտահերթ ընտրությունների համար։ Դա ոչ միայն անընդունելի է ինձ համար եւ մեր քաղաքական ուժի համար, սա անընդունելի է ժողովրդավարության եւ սահմանադրության տեսանկյունից։ Տրամաբանական կլիներ, որ Էդմոն Մարուքյանը հայտարարեր, որ իրենք պատրաստ են հուշագիր ստորագրել արտահերթ ընտրությունների վերաբերյալ՝ առանց նախապայմանների»,- ասաց նա։

Հարցին, թե ի՞նչ լուծում է առաջարկում իշխանությունը, Ռուբինյանը պաատասխանեց․ «Մենք մեր լուծումը նախորդ հանրահավաքին ներկայացրել ենք՝ Օնիկ Գասպարյանը կամ ինքը պետք է ազատման դիմում գրի, կամ նախագահը ստորագրի նրա ազատման դիմումը, որից հետո մենք կսկսենք քաղաքական կոնսուլտացիաներ քաղաքական ուժերի հետ, այդ թվում՝ արտահերթ ընտրությունների վերաբերյալ»։ 

Ռուբինյանի խոսքով՝ կեղծ է այն մտայնությունը, թե առանց ԳՇ պետի շուրջ ստեղծված իրավիճակի հանգուցալուծման հնարավոր է որեւէ քայլով ապահովել կայունություն․ 

«Այն պայմաններում, երբ ԳՇ պետը իրեն դրել է քաղաքական գծից ներս,դա չի կարող կայունություն ապահովող իրավիճակ համարվել: Այնպիսի իրավիճակ, երբ միայն իշխող ուժն է ցանկանում գնալ արտահերթի, իսկ մյուս բոլոր ուժերը չեն ցանկանում կամ մյուս բոլոր ուժերը այդ լուծումը չեն համարում հանգուցալուծում, այդ ընտրությունների անցկացումն առնվազն արդյունավետ չի լինի»,- հավելեց նա։

Ըստ Ռուբինյանի՝ իշխանության պատկերացրած ճանապարհը հետեւյալն է՝ ԳՇ պետը, որը արել է քաղաքական հայտարարություն՝ անհամատեղելի է դրանով դարձրել իրեն իր պաշտոնին։ «Չի կարող ԳՇ պետի պաշտոնավարումը լինել քաղաքական բանակացությունների առարկա։ Չի կարող լինել գործոն, եթե դա լինի գործոն, ապա այդ քաղաքական ուժերը խոստովանում են, որ զինվորականությունը դարձել է քաղաքական գործոն Հայաստանում»,- ասաց նա։