«Մենք պատրաստ ենք գնալ Ազգային ժողովի լուծարման գործընթացին»․ Տարոն Սիմոնյան

Մենք պատրաստ ենք գնալ Ազգային ժողովի լուծարման գործընթացին. Ազգային ժողովում լրագրողների հետ զրույցում ասաց «Լուսավոր Հայաստան» խմբակցության պատգամավոր Տարոն Սիմոնյանը: Տարոն Սիմոնյանը հայտարարեց, որ ԼՀԿ-ն պատրաստ է Նիկոլ Փաշինյանի հրաժարականից հետո վարչապետի նոր թեկնածու չառաջադրել: 

«Մենք ամեն ինչ ուզում ենք անել, որ արտահերթ ընտրություններ լինի, որ լուծարվի այս Ազգային ժողովը, որը չի նպաստում քաղաքական ճգնաժամի լուծմանը։ Չենք առաջադրվի, մի հատ էլ հայտարարություն կանենք: Ես՝ որպես Տարոն Սիմոնյան, չեմ համոզի Էդմոն Մարուքյանին, որ առաջադրվի»,- ասաց Սիմոնյանը:

Հիշեցնենք, որ Հանրապետության հրապարակում երեկ հրավիրված հանրահավաքի ժամանակ Նիկոլ Փաշինյանը հայտարարել էր, որ խորհրդարանական ուժերի համաձայնության դեպքում իշխանությունը պատրաստ է գնալ ԱԺ արտահերթ ընտրությունների եւ արդեն այսօր ԱԺ փոխխոսնակ Ալեն Սիմոնյանը չի ասել է, որ Փաշինյանը հնարավոր է հանդիպի ԲՀԿ խմբակցության ղեկավար Գագիկ Ծառուկյանին։ Մարուքյանն էլ ասաց, որ Նիկոլ Փաշինյանը այսօր իրեն հրավիրել է հանդիպման։