Վարդենիկում սուբվենցիոն ծրագրերի շրջանակում կկառուցվի նոր գազատար

Գեղարքունիքի մարզի Մարտունի համայնքի Վարդենիկ գյուղում ՀՀ կառավարության կողմից իրականացվող սուբվենցիոն ծրագրերի շրջանակներում կկառուցվի նոր գազատար՝ 12,5 կլիոմետր երկարությամբ։ Այս մասին հայտնում են Գեղարքունիքի մարզպետարանից:

Վարդենիկի նորաստեղծ թաղամասի գազատարի կառուցման ծրագրի նախնական ընդհանուր արժեքը կազմում է 27 միլիոն դրամ, որի 60 տոկոսը կամ 16 միլիոն 200 հազարը հատկացնում է ՀՀ կառավարությունը, 40 տոկոսը կամ 10 միլիոն 800 հազար դրամը՝ Մարտունու համայնքապետարանը։

Շինարարական աշխատանքների մրցույթը կհայտարարվի առաջիկա օրերի ընթացքում։ Ծրագրի ավարտից հետո բնական գազից օգտվելու հնարավորություն կունենան Վարդենիկի նորաստեղծ թաղամասի 300 ընտանիք։