Քաղաքացիակենտրոն
լրատվություն

Սեպտեմբերյան երկօրյա պատերազմում զոհված 201 զինվորների մարմինները նույնականացված են, կան մարմիններ, որոնք խոշտանգված են եղել. ՀՀ առողջապահության նախարար

Սեպտեմբերյան երկօրյա պատերազմում զոհված 201 զինվորների մարմինները նույնականացված են, կան մարմիններ, որոնք խոշտանգված են եղել. ՀՀ առողջապահության նախարար
Հայաստան
13:33, 20 октябрь 2022
Civic.am-ի հարցերին պատասխանել է ՀՀ առողջապահության նախարար Անահիտ Ավանեսյանը։ 

- Տիկին Ավանեսյան, Ադրբեջանը թույլ չի տալիս Հայաստանին սեպտեմբերի 13-14-ի ռազմական գործողությունների ընթացքում իր ԶՈՒ-ի կողմից ՀՀ օկուպացված տարածքներում գտնվող հայ զինվորների մարմինները հանել։ Արդյոք այդ մարմինները տևական ժամանակ առանց հետազոտության մնալով հնարավոր կլինի՞ պարզել՝ եղե՞լ են խոշտանգված, թե՞ ոչ։  

- Ես վստահ եմ, որ մեր մասնագետները և փորձագետները կանեն հնարավորը, որպեսզի փաստագրեն՝ տվյալ զինծառայողների մարմինները խոշտանգվե՞լ են, թե՞ ոչ։ Սա բոլոր հումանիտար կանոններին դեմ քաղաքականություն է, և Միջազգային Կարմիր խաչի կոմիտեի ու այլ միջազգային կառույցների դիրքորոշումը շատ հստակ է, որ պետք է հնարավորություն ընձեռվի այդ մարմինները մեր կողմից վերցվելու և համապատասխան կերպով նրանց հուղարկավորության ընթացքն ապահովելու։

- Դուք որոշ ժամանակ առաջ, ի պատասխան մեր հարցի, ընդգծել էիք, որ սեպտեմբերյան դեպքերից հետո դեռևս կան մարմիններ, որոնք նույնականացման փուլում են։  Ավարտվե՞լ է նույնականացման գործընթացը, և տեսնո՞ւմ եք անհրաժեշտություն որոշ մասունքներ արտերկիր ուղարկելու՝ ԴՆԹ անջատելու համար։ 

- Անհրաժեշտություն չկա արտերկիր ուղարկելու, արդեն տևական ժամանակ է՝ նույնականացման գործընթացն ավարտվել է, բոլոր՝ 201 մարմինները նույնականացված են։ 

- Զոհվածների հարազատներից կա՞ն մարդիկ, որոնք չեն ընդունել նույնականացման փաստը, այսպես ասած՝ վստահ չեն, որ իրենց հարազատի մարմինն է։

- Սեպտեմբերի 13-14-ին զոհված զինծառայողների մասով չունենք նման դեպքեր։ 

- Նույնականացված մարմինները խոշտանգված եղե՞լ են։

- Այդ մասին մանրակրկիտ կազմվել են փորձաքննության եզրակացություններ, որոնք առկա են, կան մարմիններ, որոնք խոշտանգված են եղել։ Այդ ինֆորմացիան մենք փոխանցում ենք թե ՀՀ ՄԻՊ-ին, թե Միջազգային իրավական հարցերով ՀՀ ներկայացուցչի գրասենյակին, թե այլ ատյանների։ Ես վստահ եմ, որ Հայաստանը հետևողականորեն Ադրբեջանից պահանջելու է պատասխանատվություն այդ խոշտանգումների հետ կապված։ 

- Սեպտեմբերյան 2-օրյա ռազմական դեպքերից հետո Ադրբեջանը գերիներ վերադարձրեց Հայաստանին, որոնցից 7-ը հիվանդանոցային հետազոտություն էին անցնում, եղե՞լ են զինվորներ, որ վիրահատվել են Հայաստանում։ 

- Ոչ, վիրահատության անհրաժեշտություն չի եղել, բոլորն անցել են անհրաժեշտ բուժզննում և դուրս են գրվել հիվանդանոցից։ Հիվանդանոցային օգնության կարիք չի եղել։ 

Նարա Մարտիրոսյան