Արցախի ԱԻ նախկին փոխնախարարը ՀՀ իշխանությանը մեղադրում է Մուրադովին «վիրավորելու» համարձակության մեջ

Ազգային ժողովում գերիների հարցով քննարկման ընթացքում Արցախի ԱԻ նախկին փոխնախարար Բորիս Ավագյանը «Իմ քայլը» խմբակցությանը մեղադրեց գերիների վերադարձի հարցը բարդացնելու համար։

«Գերիների հարցով վերջերս սկսվել է մի գործընթաց, երբ «Իմ քայլի» պատգամավորներից ոմանք հայտարարում են՝ գնացեք ՌԴ դեսպանի մոտ, եւ թող նա դիմի Ռուսաստանի նախագահին։ Կարծում եմ՝ դա անթույլատրելի է, որ պատգամավորը թույլ է տալիս իր քաղաքացիներին ուղղել օտարերկրյա դեսպանի մոտ, որ այդ դեսպանն էլ զեկուցի իր երկրի նախագահին», - ասաց նա։

«Իմ քայլի» պատգամավորների մասին խոսելով՝ Ավագյանն ասաց, որ շատերին նրանցից հարգում է, բայց որպես պատգամավոր նրանք ավելի լավ է ելույթ չունենան, որովհետեւ կվնասեն իրենց քաղաքական թիմին, քանի որ, ըստ նրա, քաղաքացիների մոտ վրդովմունք է առաջանում։ 

«Ունես մի դաշնակից, որը ամեն ինչում օգնում է, բայց թույլ ես տալիս որպես իշխող ուժ, որ պետական աշխատողները համարձակվեն վիրավորել դաշնակցի պետական այրերին կամ պաշտոն զբաղեցնողներին։ Մենք տեսանք՝ Ավանի փոխթաղապետը, եթե չեմ սխալվում՝ թույլ էր տալիս սոցցանցերում վիրավորել խաղաղապահների հրամանատարին, որից հետո չքննադատվեց։ Կարծում եմ՝ դա դժվարացնում է գործընթացը, որովհետեւ մեր դաշնակից մարդիկ ստանում են այդպիսի վերաբերմունք», - հավելեց նա։

Հիշեցնենք, որ Արցախում ռուսական խաղաղապահ զորակազմի հրամանատար, գեներալ-լեյտենանտ Ռուստամ Մուրադովը, դատարկ օդանավով Բաքվից վերադարձից հետո հայտարարել էր, որ Հայաստանի պաշտոնատար անձինք թյուրիմացության մեջ են գցում բնակչությանը։

Hraparak.am-ի հարցին, թե ինչո՞ւ էին Հայաստանի պաշտոնատար անձինք ապրիլի 8-ին հայտարարում, որ գերիներ են վերադառնալու, բայց այդպես էլ չվերադարձան, Մուրադովը պատասխանել է․ «Կեղծ պրովոկացիա էր: Նրանք թյուրիմացության մեջ են գցում բնակչությանը»։