«Դա ընդունված պրակտիկա է․ նման մեծ միջոցառումներ հյուրընկալող երկրների ղեկավարները շատ հաճախ հրավիրում են բարեկամ պետությունների իրենց գործընկերներին»․ ԱԺ նախագահի խոսնակը՝ Ալեն Սիմոնյանի Կատար այցի մասին

Կատարի Մեջլիս Աշ-Շուրայի (խորհրդարանական գործառույթներով խորհրդատվական խորհուրդ) նախագահի հրավերով նոյեմբերի 30-ից դեկտեմբերի 3-ը ՀՀ ԱԺ նախագահ Ալեն Սիմոնյանը աշխատանքային այցով կմեկնի Դոհա՝ Կատար։ Ինչպես հայտնի է՝ Կատարում այս օրերին ընթանում է ֆուտբոլի աշխարհի առաջնությունը, և ՀՀ ԱԺ նախագահը, աշխարհի այլ խորհրդարանների ղեկավարների հետ հրավիրվել է որևէ խաղ դիտելու։ 

ԱԺ նախագահի խոսնակ Ծովինար Խաչատրյանը Civic.am-ի հետ զրույցում հաստատեց, որ Ալեն Սիմոնյանը հրավեր է ստացել Կատարի խորհրդարանի ղեկավարի կողմից՝ այցելելու իրենց երկիր և դիտելու աշխարհի առաջնության խաղերից մեկը։ 

«Դա ընդունված պրակտիկա է, շատ հաճախ են նման հրավերներ լինում։ Կատարի պետությունը մեր բարեկամ երկիրն է և սա էլ ավելի կամրապնդի բարեկամությունն այդ երկրի հետ։ Բացի դա, սա աշխատանքային այց է Կատար, որի ընթացքում քննարկվելու և հստակեցվելու են Կատար ՀՀ ԱԺ նախագահի առաջիկա պաշտոնական այցի օրակարգային հարցերը»,- նշեց խոսնակը։  

ՀՀ ԱԺ նախագահի կարգադրությունում նշված է, որ պատվիրակության կազմում են լինելու նաև ԱԺ նախագահի խորհրդատու-օգնական Համլետ Գևորգյանը և ԱԺ աշխատակազմի արարողակարգի վարչության պետ Հակոբ Հաջի-Հակոբյանը: 

Այցի ծախսերը մասնակի կատարում է հրավիրող կողմը։