«Մատաղի նման ընդունելի է»․ Գևորգ Պետրոսյանը՝ քաղաքացիական դատավարության օրենսգրքում փոփոխությունների առաջարկի մասին

ԱԺ պետաիրավական հարցերի մշտական հանձնաժողովի այսօրվա նիստում քննարկվեց քաղաքացիական դատավարության օրենսգրքում լրացումներ կատարելու մասին օրենքի նախագիծը։ Հիմնական զեկուցող Գևորգ Պետրոսյանը ներկայացնելով նախագիծը նշեց, որ ՀՀ Սահմանադրությամբ մարդը և իր արժանապատվությունը բարձրագույն արժեք են և իր արժանապատվությունը վիրավորելը պետք է ավելի խիստ պատժվի։ Գևորգ Պետրոսյանը առաջարկեց, որ նմանօրինակ գործերը դատարաններում ավելի սեղմ ժամկետներում քննվի։

«Օրինակ մարդու անվան հետ կապվում են ինչ-որ երևույթներ, որոնք իրականության հետ կապ չունեն ու դատարանները, ելնելով դատական պրակտիկայից տարիներով քննում են մարդու արժանապատվությանը պատճառած վնասի գործերը։ Ասենք երեք տարի դատարաններում նիստը հետաձգվում է, երկու ամիսը մեկ նիստ է գումարվում, իսկ դրա ավարտն էլ ի՞նչն ա՝ լավագույն դեպքում մի միլիոն կամ երկու միլիոն դրամ տուգանում են ու վերջ։ Բայց եթե ՀՀ-ում մարդը և իր արժանապատվությունը բարձրագույն արժեք են, ես չեմ հավատում, որ որևէ մարդ, որ ունի արժանապատվության և ինքնահարգանքի զգացում ասի՝ ինչ լավ է, որ 5 միլիոն դրամ ստացա, ջանդամ թե ինձ չէին վիրավորել։ Իմ առաջարկն է, որ մենք սեղմենք այն ժամկետները, որոնց ընթացքում  պետք է քննվի զրպարտության և վիրավորանքի գործերը», - ասաց Գևորգ Պետրոսյանը։

Պատգամավոր Արթուր Դավթյանը Գևորգ Պետրոսյանին առաջարկեց 203.2 հոդվածում առաջին ատյանի վարույթում քննվելու համար երկամսյա ժամկետը փոխել եռամսյա ժամկետով։ «Մատաղի նման ընդունելի է», - արձագանքեց Գևորգ Պետրոսյանը։

Կառավարության ներկայացուցիչը հետաքրքրվեց՝ արդյո՞ք Պետրոսյանը ուսումնասիրել է պրակտիկան, դատարանները կտեղավորվե՞ն առաջարկվող ժամկետներում, որպեսզի չստացվի այնպես, որ  դատարանները օրենքը ընդունելու դեպքում հայտնվեն  կազուսային իրավիճակներում։ Գևորգ Պետրոսյանը նշեց, որ այս գործերով ապացույցներ ներկայացնելը շատ ավելի հեշտ է և ժամկետների խնդիրներ որպես կանոն չեն առաջանում․ «վիրավորողը կա, փաստը կա, բայց գործերը ձգձգվում են», - ասաց Պետրոսյանը։

Օրենքի նախագիծը հանձնաժողովի կողմից ընդունվեց միաձայն։