Քաղաքացիակենտրոն
լրատվություն

Անվտանգության երաշխիքների վերաբերյալ Ժնևում Ռուսաստանի և ԱՄՆ-ի միջև խորհրդակցություններ կանցկացվեն

Անվտանգության երաշխիքների վերաբերյալ Ժնևում Ռուսաստանի և ԱՄՆ-ի միջև խորհրդակցություններ կանցկացվեն
Միջազգային
12:58, 28 декабрь 2021
Ռուսաստանի և ԱՄՆ-ի ներկայացուցիչները հունվարի 10-ին բանակցություններ կվարեն Ուկրաինայի շուրջ ստեղծված իրավիճակի, Եվրոպայում անվտանգության, ինչպես նաև սպառազինությունների վերահսկման շուրջ։ Այս մասին երեկ հայտնել է Agence France-Presse գործակալությունը՝ վկայակոչելով Սպիտակ տան Ազգային անվտանգության խորհրդի ներկայացուցչին։

«Երբ մենք նստում ենք բանակցությունների սեղանի շուրջ, Ռուսաստանը կարող է հայտնել իր մտահոգությունները, իսկ մենք՝ մերը, այդ թվում՝ Ռուսաստանի գործունեության մասին»,- ասել է նա։

Ինչպես նշում է AFP-ն, հունվարի 10-ին երկկողմ բանակցությունները կանցկացվեն ռազմավարական անվտանգության շուրջ երկխոսության շրջանակներում։ Ըստ ԱԱԽ ներկայացուցչի՝ բանակցությունների ձևաչափն առաջին հերթին նվիրված է լինելու սպառազինությունների վերահսկմանը, և հանդիպմանը քննարկվելու է նաև ռուս-ուկրաինական սահմանին տիրող իրավիճակը։

Հունվարի 12-ին և 13-ին կայանալիք հետագա հանդիպումներում, նշում է AFP-ն, կքննարկվի Ուկրաինայի շուրջ ստեղծված իրավիճակը։

Ռուսաստանի հետ ցանկացած պայմանավորվածություն հաշվի կառնի Ուկրաինայի շահերը, հավելել է ամերիկացի պաշտոնյան։

«Նախագահ Ջո Բայդենի մոտեցումն Ուկրաինայի նկատմամբ հստակ է և հետևողական՝ միավորել Հյուսիսատլանտյան դաշինքը երկու ճակատի շուրջ՝ զսպման և դիվանագիտության»,- ասել է նա:

Պաշտոնյան հավելել է, որ ՆԱՏՕ-ի անդամները «միասնական են նաև Ռուսաստանի հետ սկզբունքային դիվանագիտություն վարելու իրենց հանձնառության մեջ»:

Ինչպես նշում է AFP-ն, այս պահին հայտնի չէ, թե կոնկրետ ովքեր են մասնակցելու հունվարի 10-ին կայանալիք բանակցություններին։ 

Սպիտակ տունը և Պետդեպարտամենտը դեռ չեն պատասխանել այս տեղեկատվության վերաբերյալ մեկնաբանությունների խնդրանքին։

Երկուշաբթի ՌԴ ԱԳ նախարար Սերգեյ Լավրովը հայտարարել էր, որ Ռուսաստանի և ԱՄՆ-ի միջև անվտանգության երաշխիքների շուրջ բանակցությունների հիմնական փուլը տեղի կունենա ամանորյա տոներից անմիջապես հետո։ Նախարարը հավելել էր, որ Մոսկվայի համար կարևոր է բանակցությունների ժամկետը՝ նշելով, որ դրանք չեն կարող ձգձգվել, չնայած այն հանգամանքին, որ Ռուսաստանի Դաշնությունը վերջնագրեր չի ներկայացնում այդ հարցում։ Լավրովն ընդգծել է նաև, որ այդ առումով Վաշինգտոնը Ռուսաստանի հետ անվտանգության երաշխիքների հիմնական բանակցողն է։

Դեկտեմբերի 17-ին ՌԴ արտաքին գործերի նախարարությունը հրապարակեց ԱՄՆ-ի հետ անվտանգության երաշխիքների և Ռուսաստանի Դաշնության և Հյուսիսատլանտյան դաշինքի անդամ երկրների անվտանգության միջոցառումների մասին համաձայնագրի նախագիծը։ Դրանք դեկտեմբերի 15-ին հանձնվել են ԱՄՆ պետքարտուղարի Եվրոպայի եւ Եվրասիայի հարցերով օգնական Քարեն Դոնֆրիդին։