Ռասմուսեն՝ «Եկել է ՆԱՏՕ-ի հարցում Վրաստանին և Ուկրաինային տրված խոստումը կատարելու ժամանակը»

ՆԱՏՕ-ի նախկին գլխավոր քարտուղարն առաջարկում է Վրաստանի և Ուկրաինայի անդամակցության նոր տարբերակ:

Politico հանդեսին տված հարցազրույցում Դանիայի նախկին վարչապետ, Հյուսիսատլանտյան դաշինքի նախկին գլխավոր քարտուղար, այժմ վերլուծաբան, Rasmussen Global խորհրդատվական ընկերության հիմնադիր Անդերս Ֆոգ Ռասմուսենն ասել է, որ Ուկրաինային և Վրաստանին պետք է շնորհել անդամի կարգավիճակ, չնայած այն հանգամանքին, որ երկու երկրներն ունեն տարածքային չլուծված վեճեր:

Ռասմուսենի համոզմամբ, այդ նպատակին հասնելու համար կարելի է սահմանափակել ՆԱՏՕ-ի Կանոնադրության 5-րդ հոդվածը կիրառելու մեխանիզմը:

«Մենք 2008 թվականին Վրաստանին և Ուկրաինային խոստացել ենք տեղ տալ ՆԱՏՕ-ում, եկել է այդ խոստումը կատարելու ժամանակը: Հարկ եղած դեպքում մենք կարող ենք դա անել հատուկ վերապահումով, փաստաթղթում ամրագրելով, որ 5-րդ հոդվածը տարածվում է միայն Թբիլիսիի և Կիևի հսկողության տակ գտնվող տարածքների վրա», - ասել է Հյուսիսատլանտյան դաշինքի նախկին գլխավոր քարտուղարը:

Կանոնադրության 5-րդ հոդվածը ՆԱՏՕ-ի հիմքն է, այն սահմանում է, որ հարձակումը ՆԱՏՕ-ի անդամ մեկ երկրի վրա հավասարազոր է հարձակման ամբողջ դաշինքի վրա:

Փաստորեն 5-րդ հոդվածը բոլոր երկրներին պարտադրում է գործադրել ռազմական կարողությունները և պաշտպանել դաշնակցին՝ անկախ նրանից, թե որ պետությունն է դարձել թիրախ՝ միջուկային գերտերություն Ամերիկա՞ն, թե՞ համեստ կարողություններով փոքրիկ Էստոնիան:

Բայց ինչպե՞ս խուսափել միջուկային մեկ այլ գերտերության՝ Ռուսաստանի հետ վտանգավոր առճակատումից: Չէ՞ որ Ղրիմը բռնազավթված է, իսկ Ուկրաինայի արևելյան շրջանի զգալի մասը գործնականում ռուսների հսկողության տակ է: Բացի այդ, Աբխազիան և Հարավային Օսիան ռուսների ռազմական ուժով անջատվել են Վրաստանից և հռչակել են անկախություն, որը հզոր պետություններից միայն Ռուսաստանն է ճանաչել:

ՆԱՏՕ-ի նախկին գլխավոր քարտուղարի փոխանցմամբ, Վրաստանին և Ուկրաինային անդամություն շնորհելիս կարելի է պաշտոնապես նշել, որ Հյուսիսատլանտյան դաշինքը որևէ պարագայում առնչություն չունի Վրաստանից և Ուկրաինայից անջատված տարածքների խնդրի հետ:

«ՆԱՏՕ-ն չի կարող նոր անդամների հարցում վարել բաց դռների քաղաքականություն և միաժամանակ Վլադիմիր Պուտինին փոխանցել դռնապանի իրավունքը», - ասել է Ռասմուսենը:

Աղբյուր՝ azatutyun.am