Ռուս-ուկրաինական բանակցությունների անցկացման վայրը փոխվել է

ՌԴ հետ բանակցությունները կկայանան, սակայն դրանք կանցկացվեն ոչ թե Բելառուսում` Բելովեժյան թավուտում, այլ մեկ ուրիշ վայրում: Այս մասին ֆեյսբուքյան իր էջում գրել է ուկրաինական պատվիրակության ներկայացուցիչ Դավիթ Արախամիան:

«Բելովեժյան թավուտում բանակցությունների անցկացման մասին տեղեկությունն իրականությանը չի համապատասխանում: Բանակցություններն իսկապես տեղի կունենան, սակայն դրանց անցկացման վայրը այլ է: Բոլոր մանրամասները կհաղորդվեն ավելի ուշ»,- գրել է նա:

Երեկ եեկոյան ՌԴ պատվիրակությունը ժամանել էր Բելովեժյան թավուտ և հայտարարել էր, որ բանակցությունները կկայանան այնտեղ, իսկ վայրը կողմերն ընտրել են միասին: Իսկ հանդիպման կազմակերպիչ բելառուսական կողմն անգամ լուսանկար էր հրապարակել բանակցությունների անցկացման սրահից: