Ակնկալել, որ այս ապացույցների հիման վրա ՍԴ-ն կարող է նման որոշում կայացնել, մի քիչ վեր է երևակայությունից․ lragir.am

Մեր զրուցակիցն է «Արդար Հայաստան» կուսակցության նախագահ, փաստաբան Նորայր Նորիկյանը

-Պարոն Նորիկյան, ՍԴ-ն կարո՞ղ է արդյոք այնպիսի որոշում կայացնել, որ նորից արտահերթ ընտրություններ լինեն:

-Նախ պետք է համեմատական վերլուծության ենթարկել նախորդ տարիների ընտրական վեճերը ՍԴ-ում, այd թվում դրանց հիմքերը: Այն հիմնավորումները և այն փաստական ապացույցների բազան, որը ներկայացվում է և հայտարարվում, որ այս հիմքերով ՍԴ-ն պետք է անվավեր ճանաչի ընտրությունների արդյունքները, դրա համար մի քիչ երևակայություն է պետք ունենալ: Բնականաբար, պետք է արձանագրել, որ ցանկացած պարագայում ընտրությունները չեն կարող իդեալական լինել: Քաղաքական ուժերը, հասարակական գործիչները, լրատվամիջոցները պետք է ներկայացնեն բազմակողմանի տեղեկություններ, որ ընտրությունների արդյունքները կարող են անվավեր ճանաչվել միայն այն դեպքում, եթե ընտրությունների ընթացքում տեղի են ունեցել այնպիսի խախտումներ, որոնք կարող են էապես ազդել ընտրությունների ելքի վրա: Եթե էական խախտումներն առկա չեն, ընտրությունները չեն կարող անվավեր ճանաչվել: Հետևաբար, թեև տվյալ սուբյեկտների իրավունքն է դիմել ՍԴ, բայց ակնկալել, որ այս ապացույցների հիման վրա ՍԴ-ն կարող է նման որոշում կայացնել, մի քիչ վեր է երևակայությունից: Կապրենք, կտեսնենք, թե ինչ որոշում կկայացնի ՍԴ-ն:

-Կարո՞ղ ենք համոզված լինել, որ ներկա կազմով ՍԴ-ն կկայացնի իրավական, այլ ոչ քաղաքական որոշում:

-Ես երկու տարի շարունակ միշտ ասել եմ, որ այս Սահմանադրական դատարանը ընդհանրապես պետք է լուծարել: «Արդար Հայաստան» կուսակցության նախընտրական ծրագրում էլ կա, որ պետք է ՍԴ-ն լուծարել սահմանադրական փոփոխությունների միջոցով: Պետք է ստեղծել նոր Վճռաբեկ դատարան, որի մի ատյանը կլինի սահմանադրական արդարադատություն իրականացնող պալատ: Ես գտնում եմ, որ այս ՍԴ-ն իր հիմնադրման օրվանից ուղղակիորեն, ցավոք սրտի, չի իրականացրել այն առաքելությունը, որի համար կոչված է:

-Ապօրինի գույքի բռնագանձման հետ կապված դուք ունե՞ք համոզմունք, որ գնում են ճիշտ ճանապարհով:

-Կյանքը ցույց կտա, թե ինչ արդյունքներ կունենանք: Ակնհայտ է, որ որոշակի սպասելիքներ կան այդ օրենքի կիրառումից: Պետք է տեսնենք, հասկանանք, թե ինչ արդյունքներ կլինեն: Քանի դեռ վերջնական արդյունք չկա, կարելի է խոսել թվերից, աղմուկից, հասարակական հնչողությունից, բայց ինձ հետաքրքրում է արդյունքը: Եթե կլինի արդյունք, ես ինքս կարձանագրեմ, որ արդյունք կա: Մեկը չի, երկուսը չի, անգամ 100-ը չի, բազմաթիվ այդպիսի գործեր կան, և ապօրինի ծագում ունեցող գույքի բռնագանձման մասին օրենքը ընդամենը գործիքներից մեկն է: Բազմաթիվ այլ գործիքներ էլ կան, որոնք կարող են կիրառվել և որի արդյունքում օրինականությունը կվերականգնվի: Ինձ համար մենակ այս օրենքի կիրառմամբ չի պայմանավորված կոռուպցիայի դեմ համընդհանուր և անհանդուրժողական պայքարը: Ակնհայտ է, որ դեռևս որևէ հայտնի կոռուպցիոներ չի պատժվել: Եկեք սա արձանագրենք: Դեռևս որևէ կոռուպցիոներ կոռուպցիոն բնույթի հանցագործությունների համար նախատեսված քրեական օրենսգրքով արգելված արարքի համար պատասխանատվության չի ենթարկվել: Երբ որ մի հայտնի կոռուպցիոներ, որը ժամանակին զբաղեցրել է նախարարի, պատգամավորի, վարչապետի կամ նախագահի պաշտոն, կենթարկվի կոռուպցիոն բնույթի հանցագործությունով պատասխանատվության, այն ժամանակ կասեմ, որ Հայաստանում օրենքի առաջ հավասար են բոլորը, օրենքը գործում է բոլորի նկատմամբ և ՀՀ-ում պատասխանատվության ինստիտուտը սկսել է աշխատել:

-Այս պահին դեռ վա՞ղ է այդպիսի հույսեր ունենալ:

-Իհարկե վաղ է այդպիսի արձանագրում անելու համար: Տեսնենք, թե ինչ կստացվի ապագայում:

Աղբյուր՝ lragir.am