Կրեմլը բացահայտում է իր գործակալներին ՀՀ-ում, իսկ ի՞նչ է անում ՀՀ իշխանությունը, որպեսզի այդ բացահայտված գործակալների հակապետական գործունեությունը ՀՀ-ում կանխվի. Արթուր Սաքունցը՝ ОРТ-ի հաղորդման ու Անդրանիկ Թևանյանի մասին

Ռուսական ОРТ հեռուստաընկերությամբ երեկ հեռարձակվել է «Նիկոլ Փաշինյան. աղետի ավետաբերը» վերտառությամբ հաղորդում, որի թիրախում են եղել ՀՀ վարչապետ Նիկոլ Փաշինյանը, առաջին տիկին Աննա Հակոբյանը, մի շարք հայաստանյան գործիչներ, սակայն հաղորդումը իրականում հակահայաստանյան է։ Այն պատրաստվել է կեղծ թեզերի հիման վրա, որը հասարակության մեջ դժգոհությունների առիթ է դարձել, նաև՝ էլ ավելի գրգռել հակառուսական տրամադրությունները։

Թեմայի շուրջ Civic.am-ը զրուցել է իրավապաշտպան Արթուր Սաքունցի հետ, ում մասին հաղորդման մեջ ևս անդրադարձ է եղել։

- Պարոն Սաքունց, հաղորդումը վստահաբար  նայել եք. ի՞նչ եք կարծում՝ դա ի՞նչ ազդեցություն է թողնում հասարակության վրա։  Կարծիք կա, որ սա հակառակ էֆեկտ է ունենում և հենց ռուսական իշխանությունների դեմ  է դժգոհություն  առաջացնում։

- Հարցը երևի թե հենց ռուսական կողմին պետք է տալ, ОРТ-ին մասնավորապես հարցնել, թե ինչ նպատակ են հետապնդում՝ այդ ակնհայտ ապատեղեկատվությունները տարածելով։ Քանի որ որևէ ողջամիտ պատասխան ակնկալել անհնար է, պետք է բացատրել այն բանով, որ դա ՀՀ-ի դեմ Կրեմլի հիբրիդային պատերազմի դրսևորումներից մեկն է, որը իրականացնում են ապատեղեկատվությամբ՝ ներգրավելով տարատեսակ փորձագետների, այդ թվում՝ նաև հայաստանյան գործիչների, որոնք փաստորեն դառնում են ՀՀ-ի դեմ Կրեմլի հիբրիդային պատերազմի գործիքը։ Եվ մի բան էլ նշեմ։ Ես հասկանում եմ, որ ես և Լարիսա Մինասյանը Սորոսի հետ կապ ունենք, չնայած այդ մարդը իր հիմնադրամը փակել է ՀՀ-ում, բա մնացածը ի՞նչ կապ ունեն Սորոսի հիմնադրամի հետ։ Սա շատ վիրավորական եմ համարում, որովհետև եթե մնացածն էլ կապ ունենային Սորոսի հիմնադրամի հետ, ապա ОРТ-ն և ռուսական որևէ քարոզչական այդպիսի գործիք  ՀՀ-ում չէր հեռարձակվի։

- Իսկ ընդհանուր առմամբ ի՞նչ էֆեկտ ունեցավ այդ հաղորդումը։

- Ինչ էֆեկտ կարող է ունենալ  ապատեղեկատվությունը՝ բացառությամբ ՀՀ-ում կրեմլյան գործակալների հրճվանքի։ Ոչ մի այլ ազդեցություն։  

- Պարոն Սաքունց, սրանով նաև լյուստրացիա տեղի չի՞  ունենում։ Այսինքն՝ այն հայաստանյան գործիչները, ովքեր մասնակցում են նման հաղորդումների, երևում է նրանց՝ Կրեմլի հովանավորության տակ լինելը։

- Հովանավորության տակ լինելը ակնհայտ է։ Ակնհայտ է նաև, որ Կրեմլը այդպիսի տխմար գործողություններով բացահայտում է իր գործակալներին ՀՀ-ում։ Իսկ ինչ է անում ՀՀ իշխանությունը, որպեսզի այդ բացահայտված գործակալների հակապետական գործունեությունը ՀՀ-ում կանխվի։ Մենք ժամանակին առաջարկում էինք լյուստրացիա իրականացնել պետական կառավարման համակարգում, իրավապահ մարմիններում և քաղաքական դաշտում։ Համակարգային օրենքի հիման վրա ստեղծված գործիքներով լյուստրացիան կհանդիսանա ոչ միայն բացահայտելու հնարավորություն, այլև միջոց՝ ձեռնարկելու, որպեսզի ՀՀ  իշխանության դեմ նման ոտնձգությունները օրենքի հիման վրա ստեղծված մեխանիզմներով պատասխան ստանան։ 

- Եթե Կրեմլից հրաման են տալիս, որ հեռուստաեթերով այդպիսի հաղորդում հեռարձակվի, ապա ինչո՞ւ էր Կրեմլի ղեկավար Վլադիմիր Պուտինը վերջերս նշում, որ Հայաստանն ու ՌԴ-ն շարունակում են մնալ դաշնակիցներ։

- Ինձ չի հետաքրքրում, թե Պուտինը ինչ է ասում։ Դա հերթական իր խաբեության դրսևորումն էր։ Ինձ համար ավելի կարևոր է, թե ՀՀ իշխանությունը ինչ է մտածում, երբ նման ռեժիմի հետ շարունակում է մնալ դաշնակցային հարաբերությունների մեջ։

- Որովեհտև ռիսկեր է պարունակում, պարոն Սաքունց։

- Նման հանրային կարծիքի ձևավորումը ՌԴ-ում ևս մեծ ռիսկեր է պարունակում։ Դա ՀՀ քաղաքացիների հանդեպ է նաև ռիսկ, ովքեր գործի բերումով գտնվում են Ռուսաստանի տարածքում։

- Պարոն Սաքունց, եթե ՀՀ-ն խզի այդ դաշնակցային հարաբերությունները, ի՞նչ կոնկրետ ռիսկերի դիմաց կկանգնեն ՌԴ-ում ապրող և աշխատող մեր հայրենակիցները։ 

- Նման երևույթի ականատես ենք եղել, երբ Վրաստանի դեմ 2008 թվականի օգոստոսի 7-ին ՌԴ-ի կողմից սանձազերծված ագրեսիայից հետո տեսանք, թե ինչպես վերաբերվեցին Վրաստանի քաղաքացիներին ՌԴ-ում, երբ անգամ բեռնատար ռազմական ինքնաթիռներով էին մարդկանց վտարում դեպի Վրաստան։ Բնականաբար, նման երևույթներ կլինեն և շատ ավելի կխորանան։ Սա նաև անվտանգային սպառնալիք է։ Սրանք հարցեր են, որոնց ուղղությամբ ՀՀ իշխանությունները պետք է մտածեն, դիմագրավելու, կանխելու և վերացնելու ուղղությամբ։ Այլ հարց է նաև, թե ինչպես են այդ քաղաքացիները դիրքավորվելու, որովհետև մի օրինակ հիշեցնեմ. Վախթանգ Կիկաբիձեն  հրապարակավ հրաժարվեց Կրեմլի բոլոր շքանշաններից, պարգևներից և տեղափոխվեց Վրաստան։ Նա թողեց իր աշխատանքը, տունը,  վերադարձավ իր հայրենիք ու հստակ դիրքորոշում հայտնեց, իսկ թե ինչ դիրքորոշում են հայտնելու ՀՀ քաղաքացիները, որոնք գտնվում են ՌԴ-ում հիմա, դա արդեն հարց է։ Արդյոք նրանք կմնա՞ն պուտինյան ռեժիմի հպատակներ և մասնակիցներ ՀՀ-ի դեմ Կրեմլի կողմից իրականացվող հիբրիդային պատերազմի, թե՞ կունենան արժանապատվություն ու կմերժեն այդ հպատակությունը։ 

Դավիթ Լևոնյան