ԼՂ-ից տեղահանվածների տվյալները գրանցում ենք, որպեսզի ըստ տարիքային խմբերի և կարիքների կարողանանք աջակցել ․ Գնել Սանոսյան

70 հազար 500 բռնի տեղահանված մեր հայրենակիցներից այս պահին 13 հազար 922-ը հաշվառվել և տեղակայվել է մեր որևէ մարզում՝  հյուրանոցներում, առանձնատներում կամ հյուրատներում. այս մասին մամուլի ասուլիսի ժամանակ նշեց ՏԿԵ նախարար Գնել Սանոսյանը։

Սանոսյանը նշեց նաև, թե որ մարզում որքան բռնի տեղահանված մարդ է տեղակայվել. Արագածոտնի մարզում՝  820, Արարատի մարզում՝  2200, Արմավիրի մարզում՝ 1049, Գեղարքունիքի մարզում՝ 1349, Լոռու մարզում՝  527, Կոտայքի մարզում՝ 3594, Շիրակի մարզում՝  763, Սյունիքի մարզում՝  1918, Վայոց ձորում՝ 1027 և Տավուշում՝ 678։  

Սանոսյանը նշեց, որ Գորիսում կամ Վայքում տեղի է ունենում բռնի տեղահանվածների հաշվառում. «Նրանց տվյալները գրանցում ենք, որպեսզի ըստ տարիքային խմբերի և ըստ կարիքների կարողանանք աջակցել, և Կառավարությունը բազմաթիվ աջակցության ծրագրեր կիրականացնի»։