Քաղաքացիակենտրոն
լրատվություն

«Սյունիքում ադրբեջանական զինծառայողների առկայությունը, առավել ևս՝ տեղաշարժը, պետք է բացառվի»․ ՄԻՊ

«Սյունիքում ադրբեջանական զինծառայողների առկայությունը, առավել ևս՝ տեղաշարժը, պետք է բացառվի»․ ՄԻՊ
Հասարակություն / Իրավունք
13:14, 11 февраль 2021
Սյունիքի մարզի համայնքներում կամ համայնքներն իրար միավորող ճանապարհներին ադրբեջանական զինված ծառայողների (նաև դրոշների ու ցուցանակների) առկայությունը, առավել ևս այդ ճանապարհներով նրանց ցանկացած տեղաշարժ պետք է բացառվի և վերջ, հայտարարում է Հայաստանի մարդու իրավունքների պաշտպան Արման Թաթոյանը:

Պաշտպանի համոզմամբ, նրանք այդտեղ են հայտնվել Հայաստանի ու Արցախի խաղաղ բնակիչների և զինվորականների իրավունքների կոպիտ խախտումների, էթնիկ զտումների ու խաղաղ բնակավայրերը զանգվածային ավերելու, ինստիտուցիոնալ շարունակվող հայատյացության, խոշտանգումների և անմարդկային վերաբերմունքի, գերիներ ապօրինի պահելու ու նոր պատերազմի շարունակվող սպառնալիքների, միջազգային կանոններին կոպիտ խախտումներով մեխանիկական մոտեցումներով սահմանների «որոշման» հաշվին:

Ադրբեջանական զինվորականների ներկայությունով շարունակվում են կոպտորեն խախտվել Հայաստանի առաջին հերթին սահմանային բնակիչների իրավունքները կամ լրջորեն վտանգած են դրանք (սեփականության խախտումներ, կրակոցներ և այլն), խաղաղ կյանքն ու անդորրը, հայտնում է Թաթոյանը՝ շարունակելով․ - «Հետևաբար, ինչ էլ ուզում է լինի` նրանց ցանկացած ներկայություն կամ առավել ևս տեղաշարժ ապօրինի է, զուրկ է իրավական որևէ տիտղոսից, հակասում է միջազգային իրավունքում մարդու իրավունքների համակարգի հիմքերին»: