Քաղաքացիակենտրոն
լրատվություն

Շիրակի մարզում «Իմ քայլը» հիմնադրամի ծրագիրն ուղղված է լինելու 44-օրյա պատերազմում վիրավորում ստացած զինվորների վերաինտեգրմանը

Շիրակի մարզում «Իմ քայլը» հիմնադրամի ծրագիրն ուղղված է լինելու 44-օրյա պատերազմում վիրավորում ստացած զինվորների վերաինտեգրմանը
Հասարակություն
14:45, 09 февраль 2022
Օրերս ՀՀ վարչապետի տիկին, «Իմ քայլը» հիմնադրամի հոգաբարձուների խորհրդի նախագահ Աննա Հակոբյանի՝ Շիրակի մարզ կատարած այցի շրջանակներում ձեռք է բերվել կարևոր պայմանավորվածություն, որը մեկ մասշտաբային ծրագրի հիմք է հանդիսանալու:

Ծրագիրն իրագործելու է «Իմ քայլը» հիմնադրամը, և մեկնարկը կտրվի մեր մարզում: Այս մասին Ֆեյսբուքի իր էջում տեղեկացրել է Շիրակի մարզպետ Նազելի Բաղդասարյանը:
 
«Այն ուղղված է լինելու 44-օրյա պատերազմում վիրավորում ստացած զինվորներին:
 
«Պատերազմի մասնակիցների մասնագիտական ներուժի բացահայտման ծրագիրն» է, որի ընթացքում, լիահույս եմ, որ մեր տղաները կկարողանան իրենց մասնագիտական հմտությունները զարգացնելով՝ առաջիկայում իրենց ճիշտ տեղը գտնել աշխատաշուկայում:
 
Ի դեպ, նախօրեին «Իմ քայլը» հիմնադրամի գործադիր տնօրեն Մխիթար Հայրապետյանի հետ խոսել ենք աշխատանքների կազմակերպման ընթացքի մասին:
 
Մարզպետարանի ու հիմնադրամի աշխատակիցներն արդեն ակտիվ կապի մեջ են ծրագիրն իրագործելու համար:

Այցի ընթացքում տիկին Հակոբյանի հետ եղել ենք նաև «Էմիլի Արեգակ» բազմակի հաշմանդամություն ունեցող երեխաների կենտրոնում, որից հետո այցելել ենք «Թումո» ստեղծարար տեխնոլոգիաների կենտրոն, ծանոթացել ենք պայմաններին, զրուցել ուսումնառության մեջ գտնվող երեխաների հետ:

Այցի ավարտին տիկին Հակոբյանի հետ հանդիպել ենք նաև Ադրբեջանում պահվող շիրակցի գերեվարված տղաների մայրերի հետ»,- տեղեկացրել է Բաղդասարյանը:
 
«Ծրագրի նպատակն է վերաինտեգրել վիրավոր զինվորներին՝ որպես հասարակության լիարժեք անդամներ՝ առողջ հոգեկան ներաշխարհով և սոցիալական կապերով։ Ծրագրի առաջնահերթություններից են ընտանիքներում առողջ մթնոլորտի վերականգնումն ու առողջ ընտանիքի պահպանումը՝ որպես հասարակության կարևորագույն բջիջ։
 
Ուզում եմ ընդգծել, որ վերականգնողական շրջանից հետո մասնակիցները կկարողանան վերադառնալ աշխատանքի շուկա։ Սա հնարավորություն կտա ծրագրի մասնակիցներին ինքնուրույն հոգալ իրենց ընտանիքի կարիքները»,- ասել է Աննա Հակոբյանը։