Դատավորների ուխտագնացությունը Մայր Աթոռ չեղարկվել է. «Դատավորի կիրակին» դատավորները կնշեն՝ մասնակցելով Սուրբ Գայանե եկեղեցում մատուցվող պատարագին

«ՀՀ դատավորների միություն» ՀԿ-ն, որի նախագահ վերջերս ընտրվեց ՀՀ վերաքննիչ քրեական դատարանի դատավոր Ալեքսանդր Ազարյանը, մարտի 27-ին նախաձեռնել էր ուխտագնացություն՝ դեպի Մայր Աթոռ Սուրբ Էջմիածին։ Մեծ պահքի հինգերորդ կիրակին կոչվում է «Դատավորի կիրակի», որն ըստ  Հայ Առաքելական Սուրբ եկեղեցու օրացույցի՝ նշվում է մարտի 27-ին:

Նախաձեռնությանն արձագանքելով՝ Մայր Աթոռից տեղեկացրել են, որ հիշյալ օրը Էջմիածնի Սուրբ Գայանե եկեղեցում՝ ժամը 11:00-ին, պատարագ է մատուցվելու, ուստի այդ ընթացքում ուխտագնացություն չի կարելի իրականացնել: Դատավսրների միությունն էլ որոշել է նշված օրը Սուրբ Սարգիս եկեղեցու բակից ավտոմեքենաներով ուղևորվել  դեպի Սուրբ Գայանե եկեղեցի՝ պատարագին մասնակցելու:
 
Միության կայքում այս մասին զետեղված հայտարարության մեջ նշվում է, որ ուղևորությանը կարող են մասնակցել ինչպես դատավորները, այնպես էլ բոլոր ցանկացողները: Ուշագրավ է, որ  հայտարարության մեջ ներկայացվում է օրվա խորհուրդը բացատրող առակը՝  այրի կնոջ և դատավորի մասին։ Ըստ առակի՝ մի այրի կին անընդհատ խնդրում է Աստծուց չերկնչող և մարդկանցից չվախեցող դատավորին իր դատն անել: Դատավորը կնոջից ազատվելու համար ստիպված բավարարում է նրա պահանջը: Այս առակը պատմելուց հետո Հիսուս Քրիստոսը հավաստիացնում է բոլորին, որ եթե անարդար դատավորն այրի կնոջ դատը տեսավ, ապա Աստված առավել ևս կկատարի բոլոր նրանց խնդրանքները, ովքեր միշտ աղոթքով խնդրում են:

Առակը հորդորում է ամեն ժամ աղոթել, ինչը խորհրդանշում է հոգու մշտական մղումն առ Աստված, բայց միևնույն ժամանակ իրական աղոթքի կոչ է: 

Քանի որ խոսվեց անիրավ դատավորի մասին առակից, ապա այս համատեքստւմ արժե նշել, որ «Դատավորների միության» նախագահն է մեկը,  որը հայտնի է ոչ միայն որպես նախկին նախագահ, «Մարտի 1-ի»  գործով մեղադրյալ Ռոբերտ Քոչարյանին կալանքից ազատած, այլև որպես այդ նույն գործի շրջանակներում մարդկանց  քաղաքական դրդապատճառներով դատած «անիրավ»  դատավոր։ Մարտի 1-ի գործի շրջանակներում Ազարյանի կողմից դատվածներից են  Արմեն Խուրշուդյանը, Արա Հովհաննիսյանը, Ֆելիքս Գևորգյանը, Արամ Բարեղամյանը, որը ամիսներ առաջ արդարացվեց դատարանի կողմից։  Հայ ազգային կոնգրեսն էլ  2020-ին կազմել էր «Մարտի 1-ի» գործով ապօրինի վճիռներ կայացրած 50 դատավորի ցուցակ և այն ներկայացրել իշխանությանը։