Սյունիքի մարզպետը և ՄԱԿ-ի Փախստականների գործակալության պաշտոնյաները քննարկել են համագործակցության հնարավորությունները
Հասարակություն
Սյունիքի մարզպետ Ռոբերտ Ղուկասյանը հունիսի 28-ին հանդիպել է Հայաստանում Միավորված ազգերի կազմակերպության Փախստականների գործակալության (ՄԱԿ-ի ՓԳՀ) գործառնությունների գծով ավագ ղեկավար Ալմազ Բուրկուտովի, իրավաբանական բաժնի ղեկավար Անդրեյ Արյուպինի, ՄԱԿ-ի ՓԳՀ Գորիսի գրասենյակի ղեկավար Սահականուշ Եղիազարյանի հետ։
2021 թ․ վերջին ՄԱԿ-ի ՓԳՀ-ն գրասենյակ է հիմնել նաև Գորիսում և Սյունիքում անցած մեկ տարում ավելի քան 17 ծրագիր է իրականացրել՝ ուղղված Արցախից տեղահանված ու մարզում բնակվող ընտանիքների կյանքի բարելավմանն ու իրավունքների պաշտպանությանը։
Մարզպետը շնորհակալություն է հայտնել հյուրերին՝ Սյունիքում իրականացված ու այժմ էլ ընթացող աշխատանքների համար՝ պատրաստակամություն հայտնելով ակտիվորեն շարունակել համագործակցությունը, ինչպես նաև այս ոլորտում երկուստեք գործունեությունն առավել արդյունավետ դարձնելու համար փոխանակել տեղեկություններ ու ռեսուրսներ։
Ալմազ Բուրկուտովը նշել է, որ պատերազմից հետո Սյունիքը մեծ աշխատանք է կատարել տեղահանված անձանց ապաստան տրամադրելու ու նրանց առաջնային կարիքները հոգալու, ինչպես նաև ընդունող համայնքին ինտեգրվելու ուղղությամբ և այդ կապակցությամբ շնորհակալություն հայտնել մարզի հյուրընկալ բնակիչներին ու իշխանություններին։
Նշվել է նաև, որ ՄԱԿ ՓԳՀ-ի և իր գործընկեր կազմակերպությունների ծրագրերը Սյունիքում շարունակական և երկարաժամկետ են լինելու։
Գործակալության աշխատակիցների այցի նպատակն էր նաև քննարկել ՄԱԿ-ի ՓԳՀ-ի և այլ կազմակերպությունների հետագա գործառույթների համակարգման հնարավորությունը Սյունիքում։ Նշվել է, որ ՄԱԿ-ի ՓԳՀ-ն հումանիտար ուղղվածություն ունի․ այն տեղահանված ընտանիքների առաջնահերթ խնդիրներն է լուծում, մինչդեռ տեղահանված անձանց համար այժմ երկարաժամկետ զարգացման ծրագրեր են անհրաժեշտ՝ ընդունող համայնքում ինքնաբավ և լիարժեք կյանքով ապրելու համար։ Այդ առումով կարևորվել է համագործակցությունն այլ միջազգային կազմակերպությունների, պետական կառույցների, ՀԿ-ների, համայնքների ու դոնորների հետ՝ տեղահանված ընտանիքներին տնտեսական և զարգացման ծրագրերում ընդգրկելու նպատակով։
Այս համատեքստում, կարևորելով տարածքային կառավարման դերն ու պատասխանատվությունը, ՄԱԿ-ի ՓԳՀ աշխատակիցներն առաջարկել են, որ Սյունիքի մարզպետարանը ստանձնի ՄԱԿ-ի ՓԳՀ-ի և այլ կազմակերպությունների կողմից մարզում իրականացվող մարդասիրական և զարգացման գործողությունների համակարգումը։
Հանդիպման ընթացքում կողմերը պայմանավորվել են հետագա համագործակցության առավել արդյունավետ տարբերակների ու առաջիկա համատեղ քննարկումների մասին։
Կարդացեք նաև
18 մայիս 2022, 14:12
Սյունիքի մարզպետը միջազգային կազմակերպությունների պաշտոնյաներին է ներկայացրել առաջնային խնդիրները
24 մայիս 2022, 17:59
ՀՀ-ում ԱՄՆ դեսպանն այցելել է Սյունիք, հանդիպել մարզպետի հետ
18 ապրիլ 2022, 15:26
ՄԻՊ-ը ՄԱԿ-ի Փախստականների հարցերով հանձնակատարի հայաստանյան գրասենյակի ներկայացուցչին ներկայացրել է Արցախից տեղահանվածների խնդիրները
25 մայիս 2022, 13:02
Հայաստանն ու ԵՄ-ն միասին ջանքեր են ներդրել ժողովրդավարական երկիր ստեղծելու ուղղությամբ ու մեծ մասամբ հասել հաջողությունների․ ԵՄ դեսպանը եղել է Գորիսում
14 ապրիլ 2022, 15:38
ՀՀ ՄԻՊ-ը Սյունիքում հանդիպում է ունեցել Արցախից տեղահանված ընտանիքների հետ
23 հունիս 2021, 19:03
ՄԱԿ-ի Փախստականների հարցերով գրասենյակը կարող է ներգրավվել ԼՂ-ում փախստականների վերադարձի ապահովման գործընթացին