«Սիրում ենք համեմատվել հրեական պետության հետ, եկեք համեմատվենք այս անգամ էլ». հանրային առողջության մասնագետը՝ պատվաստվելու մասին

Հանրային առողջության մասնագետ Դավիթ Մելիք-Նուբարյանն այսօր «Մեդիա կենտրոնում» տեղի ունեցած քննարկման ժամանակ նշեց, որ պատվաստանյութերի դեմ արշավը միայն հայաստանյան խնդիր չէ, տարբեր երկրներում մարդկանց մեծ տոկոսը հրաժարվում է պատվաստումներից, սակայն նա հիշեցրեց  ԱՄՆ-ի տպավորիչ օրինակը, երբ բնակչության 1/3-րդից ավելին արդեն պատվաստվել է, իսկ նախագահ Բայդենը հայտարարել է, որ ապրիլի 4-ը՝ ԱՄՆ անկախության օրը, դիմավորելու է արդեն «հին և նորմալ ձևով»՝ կորոնավիրուսից «անկախացած»:

«Տպավորիչ է նաև  Իսրայելի օրինակը: Մենք սիրում ենք համեմատվել հրեական պետության հետ: Եկե՛ք այս անգամ էլ համեմատվենք: Իսրայելն արդեն պատվաստել է իր թիրախ ռիսկային խմբի բնակչության 84 և ավելի, իսկ ամբողջ բնակչության՝ 55-տոկոսին և ունի տեսանելի արդյունք»,- նշեց նա:

Նուբարյանի խոսքով՝ հաշվարկները ցույց են տվել, որ այս տարի՝ մինչև մի շաբաթ առաջ, կորոնավիրուսի նոր դեպքերի դինամիկան նրանց մոտ նվազել է 70 տոկոսով:

Հակապատվաստումային արշավին դիմագրավելու արդյունավետ մեթոդներից մեկը, ըստ նրա, նաև մշտադիտարկումն է, թե որ ուղղություններով է ապատեղեկատվությունը բաշխվում, ինչ կեղծ ուղերձներ են ստանում մարդիկ և ում կողմից է դա իրականացվում:

«Որքանով ես տեղյակ եմ, սիստեմատիկ կերպով այս հակապատվաստումային մեսիջների և դրանց հաղորդակցման ուղիների մասին վերլուծություն չի արվում: Բայց ես գիտեմ, որ կան լրագրողական կազմակերպություններ, որոնք այդ հետազոտություններն արել են և, կարծում եմ, համապատասխան  մարմինները, ցանկության դեպքում, կարող են դիմել և ստանալ այդ ինֆորմացիան: Դա մեծապես կօգնի ավելի թիրախավորել և ճիշտ ձևով հակազդել ապատեղեկատվությանը»,- նշեց պարոն Նուբարյանը:

ՀՀ ԱՆ հիվանդությունների վերահսկման և կանխարգելման ազգային կենտրոնի Վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը նույնպես նշեց, որ պատվաստումների դեմ է աշխատում ապատեղեկատվությունը, հակապատվաստումային շարժումը. «Ցավոք սրտի, բնակչությունն ավելի շատ տեղեկություն է վերցնում սոցցանցերից, որտեղ իրարամերժ, տարբեր մարդկանց կողմից հնչեցված կարծիքներ են, ինչի պատճառով մենք բավականին լուրջ խնդիրների առաջ ենք կանգնում»:

Տիկին Աբովյանն անդրադարձավ նաև բնակչության իրազեկման խնդրին՝ նշելով, որ Առողջապահության նախարարությունն աշխատել և աշխատում է թափանցիկ, և բնակչությունը պարբերաբար իրազեկվում է ընթացիկ աշխատանքների մասին.  «Տարբեր լրատվամիջոցների և մեդիա հարթակների միջոցով բնակչությունն իրազեկվում է, թե որոնք են ռիսկային խմբերը, ինչ պատվաստանյութեր են կիրառվում և ինչ աշխատանքներ պետք է իրականացվեն»:

Նրա խոսքով՝ մինչ պատվաստանյութերի բաշխման գործընթացը բուժաշխատողների հետ նույնպես իրականացվում են տարբեր թրեյնինգներ, նրանց ներկայացվում է պատվաստանյութի թե՛ ներմուծման, թե՛ հետպատվաստումային ռեակցիների վերաբերյալ ամբողջ տեղեկատվությունը: