Առողջապահության նախարարությունը կուսումնասիրի Աբովյանի «Դատաբժշկական գիտագործնական կենտրոնում» զոհերի մասունքների հետ կապված հարցերը. ԱՆ

Քիչ առաջ Ռոբերտ Քոչարյանի աջակից Նարեկ Մանթաշյանն իր ֆեյսբուքյան էջում գրել էր․

«Աբովյանի տուբերկուլյոզի հիվանդանոցի դիահերձարանի հատակին այս պահին հարյուրավոր զինվորների մարմիններ են պահվում՝ պոլիէթիլենային տոպրակների մեջ փաթաթած»:

Եվ հրապարակել մի քանի լուսանկարներ՝ հղում անելով Mediaport-ին

Համացանցում հայտնված տեղեկատվության վերաբերյալ հայտարարություն է տարածել ՀՀ առողջապահության նախարարությունը՝ նշելով, որ Աբովյանի «Դատաբժշկական գիտագործնական կենտրոնի» մասնաճյուղում փորձաքննված և նույնականացված մի քանի մասունքներ ու դիակներ, որոնք ժամանակավորապես պահվել են կենտրոնի ջերմամեկուսիչ պատերով նկուղային հարկում, հարազատները այլ վայր տեղափոխելու ցանկություն են հայտնել: 

«Չնայած այն հանգամանքին, որ մասունքների տեղաշարժը նպատակահարմար չէ և դրանց պահման ներկա պայմանները համապատասխանում են մասնագիտական պահանջներին, այնուամենայնիվ, որոշել ենք ընդառաջել ծնողների ցանկությունն ու տեղափոխել այլ դատաբժշկական կենտրոնի սառնարանային հատված`զերծ պահելով հարազատներին լրացուցիչ ցնցումներից: 

Եվս մեկ անգամ նշում ենք, որ մասունքներն անցել են համապատասխան նույնականացում և սպասում են, որ հարազատները վերցնեն` հուղարկավորելու համար: ԱՆ կողմից կկազմվի աշխատանքային խումբ, որը կուսումնասիրի Աբովյանի «Դատաբժշկական գիտագործնական կենտրոնի» աշխատանքների կազմակերպման հետ կապված հարցերը»,-նշված է նախարարության հաղորդագրության մեջ։