«Մանկական Եվրատեսիլում» Հայաստանը ելույթ կունենա 8-րդը. Yan Girls խումբը կներկայացնի «Do It My Way» երգը

«Մանկական Եվրատեսիլ-2023» մրցույթում  Հայաստանը ներկայացնող Yan Girls խումբը ելույթ կունենա 8-րդը: Ֆրանսիայի Նիցցա քաղաքում  երեկ տեղի է ունեցել մրցույթի բացման  պաշտոնական արարողությունը։ Խումբը, որի կազմում են  Նանեն, Նենսին, Կամիլլան, Սյուզաննան և Աիդան, հանդես կգա «Do It My Way» երգով: Yan Girls-ի օգտին կարող եք քվեարկել նաև Հայաստանից. նոյեմբերի 24-ից այցելեք jesc.tv կայք և քվեարկեք։ 

Հիշեցնենք, որ 2022 թվականին Հայաստանն էր հյուրընկալել  «Մանկական Եվրատեսիլ» մրցույթը, և  հաղթեց  Ֆրանսիան. այդ երկիրը ներկայացնող  Լիսանդրոն իր «Oh Maman» երգով հավաքեց  203 միավոր։ Հայաստանի պատվիրակ Նարե Ղազարյանն էլ  իր «DANCE!» երգով  ստացավ 180 միավոր  և զբաղեցրեց երկրորդ հորիզոնականը։ 

Հայաստանին հաղթանակ էր բերել այս մրցույթում  2021 թվականին  մասնակցած Մալենան՝ իր «Քամի, քամի» երգով։ Հայաստանը մրցույթի հաղթող է ճանաչվել նաև 2010 թվականին՝ Վլադիմիր Արզումանյանն  իր «Մամա» երգով հավաքել էր 120 միավոր  և գրավել առաջին հորիզոնականը։ 2011-ին նույնպես ՀՀ-ն հյուրընկալել էր երգի այս մրցույթը: 

Նշենք, որ մեր երկիրը «Մանկական Եվրատեսիլ»-ին  առաջին անգամ մասնակցել է 2007 թվականին՝ «Արևիկ» խմբով, և գրավել երկրորդ հորիզոնականը։ 

«Մանկական Եվրատեսիլ» մրցույթի կանոնները չեն  տարբերվում «Եվրատեսիլի» հիմնական կանոններից, բայց կան որոշ սահմանափակումներ և պահանջներ։ Մրցույթին կարող են մասնակցել 9-14 տարեկան երեխաները: Երգի խոսքերը պետք է լինեն մասնակից երկրի պաշտոնական լեզվով, հնարավոր է օգտագործել բառեր կամ նախադասություններ օտար լեզվով: Ի  տարբերություն «Եվրատեսիլ» մրցույթի, «Մանկական Եվրատեսիլ»-ում մասնակցում են թվով ավելի քիչ երկրներ, իսկ հաղթող երկիրը չի պարտավորվում հյուրընկալել մրցույթը հաջորդ տարի: Սակայն 2012-ից ի վեր մրցույթը հաղթած երկրի հանրային հեռուստաընկերությունը ստանում է ընտրության իրավունք՝ հյուրընկալելու մրցույթը կամ հնարավորությունը տալու մեկ այլ մասնակից երկրի: