Քաղաքացիակենտրոն
լրատվություն

«Հրաշագործը»․ Գյումրիում ներկայացումը խաղացել են լեփ-լեցուն դահլիճներում, այժմ հերթը Երևանինն է

«Հրաշագործը»․ Գյումրիում ներկայացումը խաղացել են լեփ-լեցուն դահլիճներում, այժմ հերթը Երևանինն է
Մշակույթ
22:33, 01 ноябрь 2022
Այսօր «Արմենպրես» պետական լրատվական գործակալությունում ՀՀ ԿԳՄՍ նախարարի տեղակալ Արա Խզմալյանը, Սոս Սարգսյանի անվան «Համազգային» թատրոնի գեղարվեստական ղեկավար Նարինե Գրիգորյանը, Գյումրու դրամատիկական թատրոնի տնօրեն և գեղարվեստական ղեկավար Լյուդվիգ Հարությունյանը հանդես են եկել «Հրաշագործը» ներկայացմանն ու երկու թատրոնների համատեղ աշխատանքին նվիրված ասուլիսով:

ՀՀ ԿԳՄՍ նախարարի տեղակալ Արա Խզմալյանը, անդրադառնալով երկու թատրոնների համատեղ աշխատանքին, որի արդյունքում ստեղծվել է «Հրաշագործը» ներկայացումը՝ ընդգծել է, որ տեղի ունեցող այս գործընթացները մասնագիտական լավատեսության հսկայական լիցք և ամուր հիմք են:

«Այն ինչի մասին տարիներով խոսել, քննարկել, կարևորել ենք՝ միջհամայնքային, համագործակցություն, համախառն ստեղծագործական կազմ, թատրոնների ստեղծագործական կոլեկտիվների ներփակվածության հաղթահարում, ռեժիսորական տարբեր ձեռագրեր, արտիստական բազմաթիվ շփումներ, որոնք հաղթահարում են ստեղծագործական կայուն կենցաղը. այս ամենն այսօր իրականանում է Գյումրու Վ. Աճեմյանի անվան պետական դրամատիկական թատրոնում: Շնորհավորում եմ մեր գործընկերներին և մեզ, որովհետև այս համագործակցության շնորհիվ իրականացվում է կարևորագույն առաջնահերթություն՝ մշակույթի ոլորտի պետական քաղաքականության համատեքստում: Ստեղծագործական բարձր ճաշակի, տաղանդի հետևողականության, բարձրագույն չափանիշներով Համազգային թատրոնի ներուժը` աշխատելով Գյումրու թատրոնի հետ, ամենամեծ խոստումներն ու սպասումներն է տալիս: Սա ձևավորում է նոր մշակույթ, քանի որ բազմաթիվ քաղաքացիներ Երևանից գնում են Գյումրի ներկայացումներ դիտելու, ինչն էլ լավագույն աշխատանքի ամենամեծ գնահատականն է»,- նշել է նախարարի տեղակալը՝ մեկ անգամ ևս ողջունելով երկու թատրոնների փոխգործակցությանն ուղղված քայլերը: Նա վստահեցրել է, որ հետայսու ևս պետական աջակցություն կտրվի նմանօրինակ համագործակցությանը:

Սոս Սարգսյանի անվան «Համազգային» թատրոնի գեղարվեստական ղեկավար Նարինե Գրիգորյանի խոսքով՝ այս համագործակցությանը թատրոնը վաղուց է ձգտել, և այս տարի երկու թատրոններն էլ բացել են դռները՝ հրավիրելով տարբեր բեմադրիչներ, ներգրավելով նոր ձեռագրեր և մոտեցումներ:

«Երկու թատրոնները «Հրաշագործը» ներկայացմամբ համախմբվել են Նիկոլայ Ծատուրյանի շուրջ, և բացի այն, որ Երևանի հանդիսատեսը կտեսնի Գյումրու թատրոնի դերասաններին Համազգայինի բեմում և հակառակը, մենք լայնացնում ենք նաև մեր հանդիսատեսի աշխարհագրությունը, ինչը մեզ համար մեծ հարստություն է: Պիեսը հիմնված է վավերագրական պատմության վրա: Այն մի աղջկա պատմություն է, որը խնդիրների պատճառով հայտնվել է վատ հոգեվիճակում: Ու ահա գալիս է մի ուսուցիչ, որն ուզում է երեխային օգնել: Ներկայացման առանցքում հավատն է, որն ուներ ուսուցիչը: Շատերը չէին հավատում, որ դա նրան կհաջողվի, սակայն ուսուցիչը ոչ մի րոպե չի կորցնում հավատը, համբերությունը, կամքը, իսկ վերջում ձեռք է բերում սեր»,- խոսելով ներկայացման թեմայի մասին՝ նշել է Նարինե Գրիգորյանը և կարևորել հանդիսատեսին ուղղված ազդակները:

Գյումրու դրամատիկական թատրոնի տնօրեն և գեղարվեստական ղեկավար Լյուդվիգ Հարությունյանը նշել է՝ ներկայացումն այնքան մեծ հնչեղություն է ստացել, որ Գյումրիում բոլոր օրերին այն անցել է լեփ-լեցուն դահլիճներում: Այժմ հերթը Երևանինն է: Մայրաքաղաքի հանդիսատեսը հնարավորություն ունի վայելելու Գյումրու պետական դրամատիկական և Համազգային թատրոնների համատեղ աշխատանքը:

«Ասեմ, որ առաջիկա ներկայացումների տոմսերն արդեն սպառվել են, մեծ հետաքրքրություն կա հանդիսատեսի կողմից: Երբ գաղափարը կա ու դրան հավատում են, վստահում են քեզ, դա էլ ավելի պարտավորեցնող է: Գյումրու թատրոնն ավանդույթ ունեցող թատրոն է, սակայն շատ կարևոր է, որ կարողանանք դռները բացել լավ ստեղծագործողների առաջ, ինչը և արեցինք»,- ասել է Լյուդվիգ Հարությունյանը:

Թատրոնների ղեկավարները միաբերան նշել են, որ առաջիկայում համատեղ բեմադրությունը՝ «Հրաշագործը» կներկայացվի նաև մյուս մարզերում և սահմանամերձ համայնքներում: