Վարչապետի որոշմամբ՝ բուհական ուղղությունների ցանկը և բովանդակությունը մշակող աշխատանքային խումբ կստեղծվի

ՀՀ վարչապետ Նիկոլ Փաշինյանի նոյեմբերի 8-ի որոշմամբ՝ ստեղծվելու է  բուհական ուղղությունների ցանկը և բովանդակությունը մշակող աշխատանքային խումբ։ Այս մասին Civic.am-ը տեղեկացավ ՀՀ կառավարության կայքից։  Աշխատանքային խմբի ղեկավարը  մինչև 2022 թվականի նոյեմբերի 30-ը պետք է մշակի և  ՀՀ վարչապետին ներկայացնի բուհական համակարգի արդիականացման վերաբերյալ վերլուծական տեղեկանք՝ դրանում ներառելով. 

1. նոր ձևավորվող բուհերի ցանկի, դրանց ուղղությունների և բովանդակության վերաբերյալ առաջարկություն. 
2. նոր ձևավորվող բուհերի կողմից իրականացվելիք կրթական ծրագրերի վերաբերյալ առաջարկություն, այդ թվում՝ ընթացիկ ծրագրերի հնարավոր միավորումների և նոր կրթական ծրագրերի ներդրման վերաբերյալ առաջարկություն. 
3. նոր ձևավորվող բուհերում ուսանողների կանխատեսվող քանակի վերաբերյալ տեղեկատվություն, այդ թվում՝ վիճակագրական տվյալներ վերջին 10 տարիներին տարեկան կտրվածքով բուհերից յուրաքանչյուրի (այդ թվում՝ մասնավոր) դիմորդների և շրջանավարտների վերաբերյալ. 
4. ակադեմիական քաղաքում նոր ձևավորվող բուհերի տեղակայման վերաբերյալ առաջարկություն. 
5. համապատասխան բուհին միավորվող գիտահետազոտական ինստիտուտների և գործառույթների վերաբերյալ տեղեկատվություն. 
6. ուհական (ֆիզիկական, բովանդակային և իրավական ենթակառուցվածքը սահմանող) ստանդարտների վերաբերյալ առաջարկություն. 
7. սպայական ուսումնական հաստատության բովանդակության վերաբերյալ հայեցակարգ՝ նկատի ունենալով, որ «սպայական ակադեմիայի» հիմնական առաքելությունը պետք է լինի պետականակենտրոն սպա պատրաստելը։ 

Ըստ որոշմանը կից հավելվածի՝ աշխատանքային խմբի  կազմում ընդգրկված են լինելու  Հայաստանի Հանրապետության վարչապետի աշխատակազմի ղեկավարը (աշխատանքային խմբի ղեկավար), Ազգային ժողովի պատգամավոր, գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահը (համաձայնությամբ), Ազգային ժողովի պատգամավոր, գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահի տեղակալը (համաձայնությամբ), կրթության, գիտության, մշակույթի և սպորտի նախարարի՝ համապատասխան ոլորտը համակարգող տեղակալը, ՀՀ կրթության, գիտության, մշակույթի և սպորտի նախարարության գիտության կոմիտեի նախագահը,  ՀՀ  գիտությունների ազգային ակադեմիայի նախագահը (համաձայնությամբ), ՀՀ վարչապետի աշխատակազմի սոցիալական հարցերի վարչության պետը,  ՀՀ փոխվարչապետ Համբարձում Մաթևոսյանի օգնական (Գևորգ Բարսեղյանը), ՀՀ կրթության, գիտության, մշակույթի և սպորտի նախարարության բարձրագույն և հետբուհական մասնագիտական կրթության վարչության պետը։