Շարունակել զենք մատակարարել Ուկրաինային կամ խնայել զինանոցը․ Bloomberg

Արևմտյան երկրները կանգնած են ընտրության առաջ՝ շարունակել զենք մատակարարել Ուկրաինային կամ խնայել իրենց զինանոցը՝ սեփական պաշտպանական կարողությունները պահպանելու համար: Այս կարծիքն է արտահայտված Bloomberg-ի հոդվածում։

Հոդվածի հեղինակը նշել է, որ, ըստ Պենտագոնի պաշտոնյաների, Կիևն օրական ծախսում է հակատանկային զինամթերքի մեկ շաբաթվա պաշար։ Այդ իրավիճակն, ըստ նրա, Արևմուտքին դնում է երկընտրանքի առաջ՝ օգնե՞լ Կիևին, թե՞ խնամքով վերաբերվել սահմանափակ հնարավորությունների նկատմամբ, որոնք կարող են անհրաժեշտ լինել սեփական պաշտպանության համար:

Լրագրողը նաև հորդորել է հիշել, որ նախքան ԱՄՆ-ին Երկրորդ համաշխարհային պատերազմում ներգրավելը, նախագահ Ֆրանկլին Ռուզվելտը ռազմական խորհրդատուների հետ ակտիվ քննարկել է՝ զենք մատակարարե՞լ Բրիտանիային, թե՞ այն պահպանել ԱՄՆ-ի հավանական ինքնապաշտպանության համար: Ըստ հեղինակի՝ Վաշինգտոնն այժմ մոտենում է «նման բեկումնային կետի»։

Ավելի վաղ հաղորդվել էր, որ Սպիտակ տունն ակնկալում է մեկ ամսվա ընթացքում ավարտել ամբողջ ռազմական օգնությունն Ուկրաինային, 800 միլիոն դոլար արժողությամբ նոր փաթեթի շրջանակներում։ Պենտագոնի ներկայացուցչի խոսքով՝ զենքի առաքումն արտերկիր, որպես կանոն, իրականացվում է ԱՄՆ կառավարության պաշտոնական հաստատումից երեք-չորս օր հետո։