Թուրքիայի նախագահի երրորդ թեկնածուն երկրորդ փուլում աջակցելու է Քըլըչդարօղլուին

Թուրքիայի նախագահի երրորդ թեկնածու Սինան Օգանը, որը մայիսի 14-ին Թուրքիայում կայացած նախագահական ընտրություններում ստացել է երեք թեկնածուներից ամենաքիչ ձայները (5%-ից ավելի), արդեն խոստացել է ընտրությունների երկրորդ փուլում աջակցել Թուրքիայի ընդդիմության առաջնորդ Քեմալ Քըլըչդարօղլուին։

Թուրքիայի նախագահի պաշտոնի համար մրցարշավից դուրս եկած, սակայն, նախնական տվյալներով, 200 հազարից ավելի ձայն ստացած Մուհարեմ Ինջեն դեռ չի որոշել, թե ում է սատարելու ընտրությունների հնարավոր երկրորդ փուլում։ Այս մասին «ՌԻԱ Նովոստի»-ին հայտնել է թեկնածուի շտաբից աղբյուրը։

Memleket կուսակցության առաջնորդ Մուհարեմ Ինջեն իր թեկնածությունը հանելու մասին հայտարարել է ընտրություններից երեք օր առաջ։ TRT հեռուստաալիքի հրապարակած նախնական տվյալների համաձայն՝ Ինջեն ստացել է ձայների ավելի քան 0,4%-ը՝ նրա օգտին քվեարկել է ավելի քան 234 հազար ընտրող, այդ թվում՝ արտերկրում։ Թուրքիայի ԿԸՀ-ն ավելի վաղ որոշել էր, որ չնայած Ինջեի՝ ընտրություններին մասնակցելուց հրաժարվելուն, նրա օգտին քվեները չեն չեղարկվելու։

«Այս պահին գնահատման գործընթաց է ընթանում այն թեկնածուի վերաբերյալ, որին (Ինջեն) կաջակցի»,- ասել է աղբյուրը։ 
Ինջեն ընտրություններին մասնակցելուց հրաժարվելուց հետո այդպես էլ չի դիմել իր կողմնակիցներին մնացած երեք թեկնածուներից մեկնումեկին քվեարկելու կոչով։