Մահացել է իտալացի դերասանուհի Կլաուդիա Կարդինալեն, նա 87 տարեկան էր։ Ինչպես AFP-ին հայտնել է դերասանուհու գործակալ Լորան Սավրին, Կարդինալեն մահացել է իր երեխաների շրջապատում՝ Փարիզից ոչ հեռու գտնվող Նեմուր քաղաքում։

Կարդինալեն ծնվել է Թունիսում 1938 թվականի ապրիլի 15-ին։ Հաղթելով գեղեցկության մրցույթում՝ Կարդինալեն հայտնվել է Վենետիկի կինոփառատոնին և ստացել կինոնկարահանման առաջարկ։

Կինոկարիերայի սկզբում Կարդինալեն բռնաբարվել է, հղիացել և որոշել է պահել երեխային։ Մի քանի տարի նրա որդին՝ Պատրիկը, պաշտոնապես համարվում էր նրա կրտսեր եղբայրը։ «Ես ստիպված էի ընդունել այդ սուտը՝ սկանդալից խուսափելու և իմ կարիերան պաշտպանելու համար»,- պատմել է դերասանուհին։

Առաջին ֆիլմերում դերասանուհուն կրկնօրինակել են, քանի որ նա իտալերեն չգիտեր: 20 տարեկանում «ես դարձա հեքիաթի հերոսուհի, մի երկրի խորհրդանիշը, որի լեզվով գրեթե չէի խոսում»,- գրել է նա իր 2005 թվականի ինքնակենսագրականում՝ «Իմ աստղերը»: Առաջին ֆիլմը, որում հնչել է հենց իր՝ Կարդինալեի ձայնը, «8½»-ն էր. այդ ֆիլմում նա նկարահանվել է 25 տարեկանում:

 Նույն՝ 1963 թվականին, Կարդինալեն խաղացել է Լուկինո Վիսկոնտիի «Ընձառյուծը» ֆիլմում: «Վիսկոնտին ուզում էր, որ ես լինեի թխահեր՝ երկար մազերով: Ֆելինին ուզում էր, որ ես լինեի շիկահեր»,- պատմել է նա:

Կարդինալեն ընդհանուր առմամբ նկարահանվել է ավելի քան 120 ֆիլմերում, այդ թվում՝ Բլեյք Էդվարդսի «Վարդագույն հովազ», Սերջիո Լեոնեի «Մի անգամ Վայրի Արևմուտքում» և Միխայիլ Կալատոզովի «Կարմիր վրան» ֆիլմերում: Էկրանին նրա խաղընկերների թվում էին Մարչելլո Մաստրոյանին, Հենրի Ֆոնդան, Մարլոն Բրանդոն, Ալեն Դելոնը, Շոն Քոններին և Բերտ Լանկաստերը: