«Պատիվ ունեմ» խմբակցության որոշմամբ հրավիրվել են խորհրդարանական լսումներ, որտեղ քննարկվելու է  խմբակցության ներկայացրած «Ազգային ճգնաժամի և կառավարման ձախողման մասին» ԱԺ հայտարարության նախագիծը։

«Նիկոլ Փաշինյանն անդառնալիորեն կորցրել է կառավարելու լեգիտիմությունը, ուստի հայտարարում են, որ այս պահին ազգային արտակարգ իրավիճակի միակ սահմանադրական լուծումը ԱԺ կողմից վարչապետին անվստահություն հայտնելու գործընթացն է, որը ենթադրում է պատգամավորների կոնսոլիդացիա, ազգային միասնության անցումային կառավարության ձևավորում»,- նշված է հայտարարության մեջ։

Թեմայի վերաբերյալ զրուցել ենք ԱԺ «Քաղաքացիական  պայմանագիր» խմբակցության պատգամավոր Լիլիթ Ստեփանյանի հետ։

«Ասեմ, որ այս խոսակցությունը շուրջ երկու տարի է՝ դեգերում է մեր քաղաքական ընդդիմախոսների մոտ։ Խնդիրն այստեղ այլ տեղ է՝ թե ովքեր են իրականում անում այս գործընթացը, ովքեր են կանգնած այս գործընթացի ակունքներում, ինչ նպատակով են անում և ինչ օրակարգ ունեն։ Հիշեցնեմ, որ որքան էլ «Պատիվ ունեմ» ֆրակցիայի անվան տակ փորձում են թաքնվել մեր գործընկերները, խոսքն իրականում ՀՀԿ-ի մասին է, Սերժ Սարգսյանի և Միշիկի հայտնի քաղաքական ուժի մասին է։ Այստեղ իհարկե ուրիշ հարց է, թե ինչո՞ւ է մինչև հիմա «Պատիվ ունեմ»-ը մնացել, որովհետև, ինչպես տեսնում ենք այս նկարում, չորս արական սեռի ներկայացուցիչներ կան, որոնցից ընդամենը մեկն է ծառայել բանակում։ «Պատիվ ունեմ»-ը սովորաբար օգտագործվում է սպայական անձնակազմի կողմից։ Էս դեպքում, թե իրենք ինչո՞ւ են մինչև հիմա էդ պատվի զոհը դարձել, ես չգիտեմ»,- ասաց պատգամավորը։

Այնուհետև պատգամավորն ասաց, որ երկրորդ հետաքրքիր հարցն այն է, որ սա թերևս Հանրապետական կուսակցության հուսահատ ճիգերն են՝ դեռևս մնալ հանրության ուշադրության կենտրոնում, որովհետև «Պատիվ ունեմ» խմբակցությունը՝ ի տարբերություն «Հայաստան խմբակցության», որդեգրել է ավելի պասիվ վարքագիծ ԱԺ-ում։

Մանրամասն՝ տեսանյութում

Լիլիթ Թադևոսյան