ՀՀ առողջապահության նախարար Անահիտ Ավանեսյանը  վերջին շրջանում հանդես է գալիս ակտիվ քաղաքական հայտարարություններով։ Նա «Քաղաքացիական պայմանագիր» կուսակցության վարչության անդամի թեկնածու էր, նաև ՔՊ Արաբկիրի տարածքային խորհրդի անդամ։ Civic.am-ի տաղավարում Ավանեսյանը նշեց՝ քաղաքականությունը վերաբերում է մեր կյանքի բոլոր ասպեկտներին, և ինքը քաղաքականությամբ իրականացնում է երկրի հետ կապված իր երազանքները. «Մեր երազանքն է ունենալ անկախ, ինքնիշխան պետություն՝ անվտանգ սահմաններով, համագործակցելով հարևան երկրների հետ կառուցել բարեկեցիկ կյանք մեր ու մեր երեխաների համար»։  

Ավանեսյանի դիտարկմամբ՝ ՀՀ կառավարությունը հանձնառություն է վերցրել  չշեղվել խաղաղության օրակարգից, և այդ հանձնառությունն իր պտուղները տալիս է։

Նախարարը միևնույն ժամանակ նշում է, որ «Քաղաքացիական պայմանագիրը» ունի հստակ օրակարգ՝ խաղաղության օրակարգը, և դրանով է 2026 թվականին ներկայանալու հանրությանը. «Սա է, որ ընդդիմադիր դաշտը բերում է ցայտնոտի։ Հասկանում ենք, որ նրանց օրակարգը խաղաղության դեմ աշխատելն է՝ պատերազմ, ո՛չ խաղաղություն, անընդհատ կախված պատերազմ, որը Հայաստանը վերջին 30 տարիներին բերել է հայաթափման, տնտեսական չզարգացման, երկրի պոտենցիալի չօգտագործման»։ 

Նա նաև համոզմունք ունի, որ քաղաքացիները ճիշտ ընտրություն են կատարելու: «Մեր ժողովրդի, մեր մայրերի  ամենակարևոր ցանկությունը հենց այն է, որ մեր երեխաներն ապրեն անվտանգ երկրում»,- ընդգծեց նախարարը։

Դիտարկմանը, թե երկրորդ նախագահը համարում է, որ խաղաղությունը ընդդիմության մենաշնորհն է,  երրորդ նախագահը դա կապիտուլյացիա է համարում, օրակարգին դեմ է նաև առաջին նախագահը, Անահիտ Ավանեսյանն արձագանքեց. «Երկրորդ նախագահը մսխեց մեր ունեցած ձեռքբերումները, Ղարաբաղը թողեց բանակցային գործընթացից դուրս, դրանից հետո եկավ Սերժ Սարգսյանը, և ի՞նչ ձեռք բերեցինք՝ ոչինչ, ունեցանք ոչ օրինական իշխանություններ, և ժողովուրդն իր որոշումը կայացրեց։ Մենք մեր ժողովրդի տված մանդատին համապատասխան  գործում ենք ու չենք շեղվում այդ օրակարգից»։  

Նախարարը խոսել է նաև առողջապահության ոլորտին առնչվող հարցերի մասին։

Հարցազրույցն ամբողջությամբ՝ տեսանյութում

Մարիամ Գրիգորյան